भांगरभूंय | प्रतिनिधी
सरकारा कडेन लुकसाण भरपाय दिवपाची मागणी
सांगें, प्रतिनिधी : अंदूं सेगीन आनी उटंगाराचो पडिल्ल्यान सांगें म्हालांतल्या विंगड विंगड वाठारांनी सुपारेच्या पिकांचें बरेंच व्हड लुकसाण जालां. पावसाक लागून चिथो आयला आनी सुपारी गळून पडल्या. चवथीच्या काळांत कांय दीस पावस नाशिल्लो. मात आतां परत कोसळपाक लागला. ताका लागून सुपारी गळून पडटा. अंदूं बागायतदारांक सारकें वखद मारपाकूय मेळूंक ना. ताका लागून सरकार लुकसाण भरपाय दिवपाची मागणी करता.
सेगीत पावस पडिल्ल्यान ही स्थिती निर्माण जाल्या
सांगें म्हालांत विशेश करून भाटी, उगें, नेत्रावळी, रिवण वाठारांत सुपारेचें पीक व्हडा प्रमाणांत आसा. सुमार साठ टक्के सुपारी गळून पडिल्ल्याचें शेतकार सांगतात. अंदूं पावस सेगीत आनी उटंगाराचो पडिल्ल्यान वखदूय मारपाक मेळूंक ना. आमी सुरवातेक आनी मदीं वखद मारलें. मात तरीय व्हडा प्रमाणांत सुपारी गळटा, अशें कोटार्ली सांगेंचे अमित दाभोलकार हांणी सांगलें.
सांगेंचे आमदार आनी मंत्री सुभाष फळदेसाय हांच्या नेतृत्वाखाला कांय शेतकारांनी मुख्यमंत्री डॉ. प्रमोद सावंत हांची भेट घेवन अर्थीक मजत करपाची मागणी केल्या.
सध्या पडपी पावस सुपारे खातीर धोको निर्माण करता. सुपारेचे गळप चालूच आसा. सुमार ५० टक्के सुपारी गळून पडिल्ल्यान लुकसाण जाल्ल्याची म्हायती नेत्रावळीचे शेतकार हर्षद प्रभूदेसाय हांणी दिली. ताका लागून सरकारान शेतकरी आधार निधी खाला शेतकारांक अर्थीक मजत दिवपाची मागणी तांणी केली.
सुपारेची हेर राज्यांत निर्यात जाल्ल्यान ताचेर सरकाराक वस्तू सेवा आनी विक्री कर मेळटा. सुपारेक सरकारा कडल्यान कसलेंच अनुदान मेळना. तशेंच सरकाराची लुकसाण भरपाय लेगीत उणी आसा. ताका लागून सरकारान सकारात्मक विचार करपाची गरज आसा अशें प्रभुदेसाय हांणी मुखार सांगलें.
मुखेलपणान सुपारी खावपाच्या जिन्नसांनी वापरता. ताची लागवड करतना सरकाराची सबसिडी मेळना. तशेंच सुपारेचो दर चड आनी सरकाराचो हमी भाव उणो अशी स्थिती आसा. आदींय सुपारी गळिल्ल्यान शेतकारांनी लुकसाण भरपाय मागिल्ली. माती ती केन्नाच दिवंक ना. अंदूं तरी मेळटली काय? हाचे कडेन सुपारी बागायतदार लक्ष दवरून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
