भांगरभूंय | प्रतिनिधी
पणजी: म्हादय अभयारण्यांत जमनी आशिल्ले दावे एका वर्सां भितर निकालांत काडपाचो आदेश मुंबय उच्च न्यायालयाच्या गोंय खंडपिठान जुलय 2023 त दिल्लो. अशें आसतना दिल्ले मुजतींत वयले दावे निकालांत काडूंक नाशिल्ल्यान गोवा फावंडेशनान उच्च न्यायालयांत अवमान याचिका दाखल केल्या.
म्हादय अभयारण्य आनी आशिकुशीचो वाठार ‘वाग राखीव वाठार’ म्हूण अधिसुचीत करचो हे खातीर गोवा फावंडेशनान उच्च न्यायालयांत 2022 वर्सा जनहीत याचिका दाखल केल्ली. ह्या प्रकरणांत न्यायालयान राज्य सरकाराक म्हादय अभयारण्य वाठार आनी आशिकुशीचो वाठार वाग राखीव वाठार म्हूण तीन म्हयन्यांत अधिसुचीत करपाचो आदेश जारी केल्लो. तशेंच अभयारण्यांत जमनी आशिल्ले दावे एका वर्सांत निकालांत काडपाचो आनी हेर निर्देश जारी केल्ले.
उपरांत राज्य सरकारान उच्च न्यायालयाच्या आदेशाक सर्वोच्च न्यायालयांत आव्हान दिलें. उच्च न्यायालयाच्या आदेशा प्रमाण, दिल्ल्या तीन म्हयन्याचे मुजतींत वाग राखीव वाठार घोशीत करूंक ना. तशेंच अभयारण्यांत जमनी आशिल्ले दावे निकालांत काडले नात. ही मुजत 24 जुलय 2024 दिसा सोंपली.
हे विशीं राज्य सरकारान न्यायालयांत अर्ज दाखल करून एका वर्साची मुजत मागली. हाका गोवा फावंडेशनान विरोध केला. तशेंच उच्च न्यायालयांत अवमान याचिका दाखल केल्या. राज्य सरकारा कडेन सुमार 800 दावे दाखल केल्ले. हे खातीर सरकारान दोन अधिकार्याची नेमणूक केल्या.
फाटल्या एका वर्सांत तातूंतले फक्त आठ दावे निकालांत काडल्यात. ताका लागून सरकारान वयले दावे निकालांत काडपा खातीर गंभीर नाशिल्ल्याचें मुखार येता. ताका लागून सरकार उच्च न्यायालयाच्या अवमानाक पात्र आशिल्ल्याचो दावो करून गोवा फावंडेशनान न्यायालयांत अवमान याचिका दाखल केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
