भांगरभूंय | प्रतिनिधी
जनआंदोलन उबारपा सयत न्यायालयांत वचपाचो निर्णय
भांगरभूंय । प्रतिनिधी
म्हापशें: एकोसीच्या जमनीचें रुपांतरण जाल्ल्यान थळाव्या लोकांनी नाराजी उक्तायल्या. तशेंच गांवांतल्या एका मेगा प्रकल्पाक विरोध केला. गांवचें घट्टण जावपाक दिवचे नात, तशेंच जनआंदोलन उबारपा सयत न्यायालयांत दाद मागपाची शिकटावणी एकोशीच्या लोकांनी दिल्या.
आयतारा धीरेंद्र फडते हांच्या फुडारपणा खाला थळाव्या लोकांनी गांवांतल्या मेगा प्रकल्पाच्या विरोधांत निशेध आंदोलन केलें. एके वटेन न्हंय आनी दुसरे वटेन दोंगुल्ली आशिल्लो एकोसी गांव राखून दवरपाची गरज आसा. थळावे लोक सध्या रान वाठारांतल्या अविकसीत भागांत चालू आशिल्ल्या बेकायदो रस्त्याच्या बांदकामा आड एकवटीत लढो दितात.
आमचो गांव दर्यादेग वाठारांत आशिल्ल्यान आमच्या गांवांत कसलोच व्हड प्रकल्प नाका. आमचे कडेन दोंगुल्ल्यो आसात, ज्यो पर्यावरणाचे नदरेन संवेदनशील आसात. दिल्लीचे एके व्यक्तीन आमी लढो दितात ते जमनीर मालमत्ता घेतल्या, अशें थळाव्या लोकांनी सांगलें. तशेंच तांणी हळदोणेंचे आमदार अॅड. कार्लोस फेरेरा हांकांय निवेदन भेटयलां आनी तेंको मागला, अशें सांगलें.
धीरेंद्र फडते हांणी सांगलें, फाटल्या कितल्याश्याच वर्सां सावन अविकसीत झोनांत सुरू आशिल्ल्या बेकायदो रस्त्याक आमचो विरोध आसा. अविकसीत जमनींतली 65 टक्के सुवात ही देंवती आसा. हालींच एका थळाव्या समाज वावुरप्याचो व्हायरल जाल्लो व्हिडियो आमी पळयला. तातूंत ताणें आमच्या गांवांत केल्ल्या झोन बदला विशीं म्हायती दिल्या. ती आयकून आमकां धपकोच बसलो. 15 दिसांनी हो झोन बदल फाटीं घेवन ना जाल्यार आमी ओगी बसचे नात, अशीय शिटकावणी फडते हांणी दिली. आमचो गांव जैव संवेदनशील वाठारांत येता, हे खातीर आमच्या जमनीचें रुपांतरण करचें न्हय, अशी विनवणी आमी सरकारा कडेन करतात. गांवचे कोनुनिदादीन लेगीत ह्या जमीन रुपांतरणाक विरोध करपाचो थाराव घेतला, अशें एका थळाव्या मनशान सांगलें.
अॅड. कार्लुस फेरेरा हांचो एकोशीकारांक तेंको
आमदार अॅड. कार्लुस फेरेरा हांणी लेगीत एकोशीच्या लोकांक आपलो तेंको दिला. आपल्याक खबर आसा, आमचीं भाटां, कुळागरां, दोंगुल्ल्यांचेर हल्लो जाता. आमची जमीन सांबाळपा खातीर आमकां पावलां उखलचीं पडटलीं. आपणे कागदपत्रां मागयल्यांत. चुकीचे पद्दतीन केल्ली वा झोन बदलिल्ली जमीन रद्द करपाची मागणी आमी मुख्यमंत्र्यां कडेन करतले. गरज पडल्यार न्यायालयांत लेगीत वचुंया, अशें आस्वासन आमदार अॅड. फेरेरा हांणी एकोशीच्या लोकांक दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
