भांगरभूंय | प्रतिनिधी
डिसेंबरांत लोकार्पण करपाचो यत्न
भांगरभूंय । प्रतिनिधी
फोंडें: धारबांदोडें म्हालांतल्या कुळें आनी मोलें पंचायतींतल्या लोकांक बेगिनूच शुद्दीकरण केल्लें उदक मेळटलें. आयज मेरेन लोकांक दुदसागर न्हंयेचें उदक पंप लावन पुरवण करतात. दोनूय पंचायत वाठारांतल्या लोकांक शुद्धीकरण केल्ल्या उदकाची पुरवण करचे खातीर बांदकाम खात्या वतीन हातांत घेतिल्लें 3 एमएलडी उदक शुद्धीकरण प्रकल्पाचें काम निमाण्या पांवड्यार पावलां. सुमार 25 कोटी रुपया खर्च करून बांदतात त्या प्रकल्पाचें डिसेंबरांत लोकार्पण करपाचो यत्न चल्ला.
कुळ्या मळीकेश्वर देवस्थाना लागसार बांदकाम खात्या वतीन 3 एमएलडी प्रकल्प बांदपाचें काम नेटान चल्लां. फुडल्या एक- दोन म्हयन्यांत तें काम पुराय करपाचे यत्न आसात. कुळें आनी मोलें पंचायत वाठारांतल्या लोकां आतां मेरेन दुदसागर न्हंयेचें उदक फिल्टर करून पुरवण करताले. मार्च, एप्रील आनी मे म्हयन्यांत दोनूय पंचायत वाठारांत उदकाचो उणाव जाता. हे खातीर नवो उदक शुद्धीकरण प्रकल्प लोकां खातीर वरदान थारतलो. कुळें पंचायत वाठारांत 1600- 1700 जाल्यार मोलें पंचायत वाठारांत एक हजार नळांचें कनेक्शन दिलां. ते खातीर 3 एमएलडी प्रकल्पांतल्यान उदकाची पुरवण करचे खातीर कांय वाठारांत नव्यो पावपलायनी घालपाचें काम बेगिनूच पुराय करतले. प्रकल्पा खातीर गरजेचेच्यो आशिल्ल्या उदकाच्या टांकयो बांदपाचें काम पुराय जायत आयलां.
पयलेच खेपे मेळटलें शुद्ध उदकः बोरकार
उदक शुद्धीकरण प्रकल्पाचें काम बेगीन पुराय करून डिसेंबरांत ताचें लोकार्पण करपाचे यत्न चल्ल्यात. 3 एमएलडी प्रकल्पाक लागून कुळें आनी मोलें पंचायत वाठारांतल्या 2500 परस अदीक लोकांक नळांतल्यान उदकाची पुरवण जातली. प्रकल्पाक लागून दोनूय पंचायत वाठारांतल्या लोकांक पयलेच खेपे शुद्धीकरण केल्लें उदक मेळयलें, अशी म्हायती धारबांदोडें म्हालाचे सहाय्यक अभियंते देविदास बोरकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
