भांगरभूंय | प्रतिनिधी
बजरंग दलाची कामगिरी: मडगांव पुलिशेंत कागाळ नोंद
मडगांव, प्रतिनिधी: खारेबांध मडगांवचे एके इमारतीचे तळमाळयेर सुरू आशिल्ल्या कत्तलखान्यांत चलिल्लें बेकायदेशीर काम बजरंग दळाच्या पदाधिकार्यांनी उक्ताडार हाडलें. दोन बैलांची सुटका करून ध्यान फावंडेशना कडेन तांकां दिले. जाल्यार मडगांव पुलिशेंत कागाळ नोंद करून हे विशीं खोलायेन चवकशी करपाची मागणी केली.
बजरंग दळाच्या विराज देसाय हांणी दिल्ले म्हायती प्रमाण, खारेबांध मडगांव हांगचे एके इमारतींत कत्तल करपा खातीर चार गोरवां हाडिल्लीं. बजरंग दळाचे सहकारी गाडयेचो फाटलाव करतना तांकां दोन रेडे आनी दोन बैल दिसून आयिल्ले. मात पुलिसांक घेवन आयले उपरांत दोनूच बैल थंय आशिल्ले. उपरांत त्या दोनूय बैलांक ध्यान फावंडेशनांत धाडले.
कत्तलखान्यांत गोरवांच्या मांसाचे चरबेचे २० किलो वजनाचे सुमार ४२ डबे मेळ्ळे. एका डब्या खातीर दोन गोरवांक मारचीं पडटात अशी म्हायती मेळ्ळी. हे सुवातेर ४१ डबे पुराय भरिल्ले आनी एक अर्दो डबो मेळ्ळा. हे खातीर सुमार ८२ गुरवां मारल्यांत, अशें कळटा. गोरवांचें मांसूय डब्यांत मेळ्ळां.
ही इमारत तीन माळयांची. हे इमारतीचे तळ माळयेर हो कत्तलखाना आसा. हांगा मांस हुंबकळपा खातीर लागपी लोखणाचो हूक, करवत, दोरयो, शस्त्रां तशेंच सागाचे आठ फुटांचे चार व्हड लाकूड सांपडलें. मांसाची ही चरबी खंय विकतात हाची खोलायेन चवकशी जावप गरजेचें, अशें देसाय हांणी सांगलें.
मारपा खातीर हाडिल्ल्या गोरवांचो ताबो दिवपाची मागणी बजरंग दळाच्या सहकार्यांनी करताच तांकां फातरांनी आनी लाकडाच्या दाण्यांनी मारपेट केली. तशेंच बायलो वायट उतरां वापरून आंगार आयिल्ल्याचो प्रकार ह्या वेळार घडलो, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
