भांगरभूंय | प्रतिनिधी
कला राखण मांड कलाकारांनी घेतली मुख्यमंत्र्यांची भेट
पणजी, प्रतिनिधी : कला अकादमीचें नुतनीकरण आनी नुतनीकरणाचेर जाल्ल्या खर्चाची तटस्थ समिती वरवीं चवकशी जातली. म्हयन्या भरात समिती अहवाल सादर करतली, अशें आस्वासन मुख्यमंत्री डॉ. प्रमोद सावंत हांणी कला राखण मांडाक दिली.
मांडाच्या कलाकारांनी सोमारा मुख्यमंत्री डॉ. सावंत हांची भेट घेवन कला अकादमीचे स्थितीचेर चर्चा केली. कला राखण मांडाचे वांगडी देविदास आमोणकार, संदेश प्रभुदेसाय हांणी मुख्यमंत्र्यांची भेट घेतली.
शुक्रारा मेरेन समिती स्थापन जातली. हे समितीचेर कला राखण मांड तशेंच चार्ल्स कुरैया फावंडेशनाचे वांगडी आसतले. समितीचो मुखेली म्हूण सरकारी अधिकारी आसचो न्हय. तटस्थ अधिकारी चवकशी समितीचो मुखेली आसचो, अशी मागणी केल्ल्याचें संदेश प्रभुदेसाय हांणी सांगलें.
नुतनीकरणा उपरांत कला अकादमीच्या सावंड सिस्टीमांत दोश तयार जाला. ग्रीन रूम तशेंच हेर फाट्यांनीय उणाव आसा. जो मेरेन हे उणाव पयस जायनात, तो मेरेन पुराय कला अकादमी कार्यावळीं खातीर बंद दवरची, अशी मागणी कला राखण मांडान केल्या. तशेंच दुरूस्ती वा सुदारणां खातीर आनीक पयशे खर्च करपाक जायना. पयलींच्याच खर्चान कंत्राटदारान दुरूस्ती करपाक जाय, अशी मागणी मांडान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
