भांगरभूंय | प्रतिनिधी
नवी दिल्ली, खबरां संस्था: किरण राव दिग्दर्शित ‘लापता लेडीज’ चित्रपटान बॉक्स ऑफिसार येस मेळयल्लें. चित्रपट समीक्षकां पसून ते बॉलीवूडमोगीं मेरेन दरेकल्याक हो चित्रपट खूब आवडिल्लो. निमाणें किरण राव हांच्या यत्नांक बरेंच व्हड येस मेळ्ळां. ‘फिल्म फेडरेशन ऑफ इंडिया’न ‘लापता लेडीज’ हो चित्रपट ऑस्करा खातीर भारताची अधिकृत प्रवेशिका म्हणून धाडला.
९७ व्या अकादमी पुरस्कारां खातीर म्हळ्यार ‘ऑस्कर २०२५’ खातीर भारता वतीन ‘लापता लेडीज’ची निवड केल्या. सर्वोत्कृश्ट आंतरराष्ट्रीय (विदेशी ) चित्रपट श्रेणी खातीर ‘लापता लेडीज’ ह्या चित्रपटाक भारता कडल्यान नामांकन मेळ्ळां. हे विशीं ‘द फिल्म फेडरेशन ऑफ इंडिया’च्या वांगड्यांनी अकादमी पुरस्कारां खातीर भारताच्या अधिकृत प्रवेशाची घोशणा केली.
फिल्म फेडरेशनान लापता लेडीज सयत वट्ट २९ चित्रपट धाडिल्ले. हातूंत रणबीर कपूरचो ‘एनिमल’, कार्तिक आर्यनचो ‘चंदू चॅम्पियन’, प्रभासचो ‘कल्की २८९८ एडी’, मल्याळम चित्रपट ‘आट्टम’, राजकुमार रावचो ‘श्रीकांत’, ‘ऑल वी इमेजिन ऍज लायट’ ह्या चित्रपटांचो २९ चित्रपटां मदीं आसपाव आशिल्लो. मात, आमिर खानच्या प्रोडक्शनाची निर्मिती आशिल्ल्या ‘लापता लेडीज’साची हातंत निवड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
