राज्यांत परतून पावसाचो उटंगार, फाल्यां रेड अलर्ट

भांगरभूंय | प्रतिनिधी

पणजी ः फुडल्या 24 वरांत बंगालच्या उपसागरांत उण्या दाबाचो पट्टा तयार जातलो. हाका लागून चार दीस गोंयांत व्हड पावस पडपाची शक्यताय आसा. ते प्रमाण हवामान खात्यान आयज पावसाचो ऑरेंज अलर्ट जाल्यार फाल्यां रेड अलर्ट जारी केल्या. 25 सप्टेंबराक ऑरेंज अलर्ट आनी 26 सप्टेंबराक येलो अलर्ट जारी केला. ह्या काळांत वादळी वाऱ्या सयत व्हड पावस पडपाची शक्यताय उक्तायल्या.
राज्यांत 23 ते 29 सप्टेंबर ह्या काळांत वाऱ्याचो वेग वराक 35 ते 65 किमी मेरेन पावपाची शक्यताय आसा. मजगतीं, नुस्ते धरप्यांनी दर्यांत वचचें न्हय असो उलो हवामान खात्यान मारला. राज्यांत 23 आनी 25 सप्टेंबराक कांय वाठारांनी 24 वरांत 2.55 ते 4.50 इंच पावस पडपाची शक्यताय आसा. जाल्यार 24 वेर 24 वरांत 4.50 ते 8 इंच पावस पडपाची शक्यताय खात्यान उक्तायल्या.
राज्यांत 1 जून ते 23 सप्टेंबर ह्या काळांत सरासरी 166.61 इंच पावसाची नोंद जाल्या. वाळपय सगळ्यांत चड 214.29 इंच पावस पडला. हाचे उपरांत सांग्यार 206.42 इंच, केपें 182.32 इंच आनी सांखळे 181.73 इंच पावसाची नोंद जाल्या. अंदूंच्या पावसाक लागून हंगामी तशेंच वर्सुकी पावसाचो विक्रम पयलींच मोडला. अंदूं जुलय आनी ऑगस्टांत विक्रमी पावसाची नोंद जाल्या.