भांगरभूंय | प्रतिनिधी
मडगांव, प्रतिनिधी ः ग्लोबल कोंकणी फोरमच्या जाळवणदारांनी कुडटरेच्या कांय नागरिका सयत आमदार आलेक्स रेजिनाल्ड हांची भेट घेतली. हे भेटी वेळार ग्लोबल कोंकणी फोरमच्या शिश्टमंडळान ‘रोमी जाय काय कदेल जाय?’ ह्या टॅगलायनीचेर आमदार आलेक्स रेजिनाल्ड हांणी आपली नाराजी उक्तायली.
रोमी जाय काय कदेल जाय? ही धमकी काय अशें तांणी ग्लोबल कोंकणी फोरमाच्या शिश्टमंडळाक विचारलें. अध्यक्ष केनेडी आफान्सो हांणी तुमकां दिसता तशें समजा, अशें सांगलें तेन्ना म्हाका अजाप जालें. आमी रोमी कोंकणी विरोधात नात. गरज पडल्यार ह्या विशयाचेर आपूण लोकां वांगडा उबो रावतलों अशें आमदार रेजिनाल्ड हांणी सांगलें.
मजगतीं ‘कदेल जाय काय रोमी कोंकणी जाय?’ ह्या ग्लोबल उपक्रमा खाला आमदारांक मेळपाक लागल्यात अशें कोंकणी फोरमाचे अध्यक्ष केनेडी आफोन्सो हांणी सांगलें. कुडटरींतल्या ग्रामसभांतल्यान रोमी कोंकणीक तेंको दिला आनी आपूण लोकां वांगडा आसा अशें रेजिनाल्ड हांणी सांगलें. रोमीचो शिक्षणांत आसपाव करप आनी अधिकृत दर्जो मेळोवपा खातीर विधेयकाचो मसुदो दिला. ताचो अभ्यास करून निर्णय घेतलों अशें रेजिनाल्डान सांगलें. कदेल जाय काय रोमी कोंकणी जाय हो प्रस्न आमदारांक आवडलो ना अशें दिसता, अशीय म्हायती आफोन्सो हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
