भांगरभूंय | प्रतिनिधी
बोरी- शिरोड्यां तुमकां दोन कॉलेजी मेळटात, एक होमिओपॅथी शिक्षण दिवपी तर दुसरी आयुर्वेदाचें शिक्षण दिवपी. आयुर्वेदिक अभ्यास करतना तुमकां झाडां, पेडां, रोपां हांची वळख जाता. संस्कृत भाशेचो सराव करचो पडटा. हे आयुर्वेदिक कॉलेजींत दोन थोड्या काळाचे डिप्लोमा कोर्स सुरु केल्यात, ते तुमकां पदवी, पदव्युत्तर शिक्षणाक लागता तितलो वेळ लागना. खेरीज नीट सारकी परिक्षा लेगीत दिवची पडना. बारावी विज्ञान फांटो घेतिल्लो बारावी पास उमेदवार ह्या मागणी आशिल्ल्या कोर्साक येवं शकता. हे दोन कोर्स म्हणल्यार पंचकर्म थेरेपी आनी हेल्थकेअर. ह्या दोनूय कोर्सांची मागणी दिसांन दीस वाडत आसा. हें लक्षांत घेवन प्राचार्य तशेंच चेअरमन नरेंद्र सावयकार हांणी हे अभ्यासक्रम सुरू करपाक मान्यताय दिल्या
हे काॅलेजीक गोवा विद्यापीठाची मान्यताय आसा. हांगा तुमी पदवी, पदव्युत्तर शिक्षण घेवं शकता. हें शिक्षण घेवपी उमेदवाराक नीट ही देशभर घेतात ते परिक्षेंत पास जावप गरजेचें आसता म्हूण घडये उमेदवार हो फायदो घेवपाक फाटी फुडें जाता आसतले. कितेंय कारणां आसू आयुर्वेदिक कॉलेजीच्या जाळवणदारांनी बरें पावल घालून हे गरजेचे ल्हान कोर्सेस सुरु केल्यात.
पंचकर्म म्हणल्यार शरीराची शुद्धी. ती शास्त्रोक्त पद्धतीन जावपाक जाय. दोतोर शिकिल्लो आसल्यान तो हें करू शकता पूण ताका मदतनीस हो जायच पडटा. तो प्रशिक्षित आसा जाल्यार चड बरें. आतां चडश्या दोतोरांक पंचकर्म करपाक उमेदवार भायल्या राज्यांतल्यान हाडचे पडटात. गोंयांत मेळनात अशें ना, पूण शिकिल्ले सोदपाक त्रास जाता हें खरे. खेरीज दोतोरांक तांचो पगार परवडपाक जाय न्हय? हे खातीर हो कोर्स बऱ्याक पडटलो, अशें जायत्या जाणांचें मत.
पिराय वाडटा तशी दुयेंसा वाडटात हें खरें, चडश्या घरांनी भुरगे कामा, धंद्याक भायर सरले काय पिराय वाडिल्ले लोक घरांतूच आसतात. तांकां उठोवपाचें, न्हिदोवपाचे काम सगल्यांक जमताच अशें ना. ह्या वेळार भलायकेची जतनाय घेवपी मनीस आसप गरजेचें. तो जर अधिकृत प्रशिक्षण घेतिल्लो आसत जाल्यार बरें. एका वळखीच्या दोतोरान सांगलें, आमकां प्रशिक्षीत मनीस मेळ्ळो जाल्यार बरें जातलें. सध्या गांवांनी व्हड समस्या निर्माण जाल्या. घरांनी ज्येश्ठ नागरीक आदार सोदीत आसतात. तांकां ल्हान, व्हड कामांक कोण तरी मजतीक जाय. भुरगीं पोटा फाटल्यान आसतात. तीं घरां रावलीं जाल्यार घर कशें चलतलें? घरांतल्या जाण्ट्या मनशांच्या भलायकेची तपासणी सद्दां जावपाक जाय. रगत तपासप, प्रेशर पळोवपाक जाय. तें तपासपाक सगल्यांकूच खबर नासता.
कोर्स केल्यार तुमकां ह्यो सगल्यो गजाली सहज जमतल्यो. समजा कितेंय जाल्यार तुमकां बेगोबेग पावलां उखलपाक मेळटलीं. 18 ते 40 वर्सां पिरायेचे उमेदवार आयुर्वेदीक काॅलेजींत प्रवेश घेवपाक शकतात. वीस उमेदवारांक संद मेळटा. जल्मदाखलो, आदारकार्ड, शाळा सोडिल्ल्याचो दाखलो, फिटनेस प्रमाणपत्र, दोन फोटो घेवन तुमी प्रवेश घेवपाक शकतात. सगली म्हायती वेवसायटीचेर मेळटा. www.gamrc.org ही ती वेबसायट. तुमी 0832- 2957305, 0832- 2956827 ह्या क्रमांकाचेर संपर्क करपाक शकतात. हे कॉलेजीचे धडपडे चेअरमन आसात नरेंद्र सावयकार आनी उपक्रमशील प्राचार्य जावन आसात प्रा. अनुरा बाळे. दोनूय कोर्स गोवा विद्यापीठाक संलंग्न आसात. खरें तर नरेंद्रबाब आनी तांच्या वांगड्यांच्या यत्नांक लागून हे कोर्स येवंक शकले. ताचो लाव गोंयकार उमेदवारांक जरूर जातलो, हातूंत मात्तूय दुबाव ना.
वतां वतां सांगपाक जाय की एमबीबीएस तशेच बीडीएस हांच्या प्रवेश खातीर दुसरी फेरी जाली. 180 सुवातां वेल्यान 200 सुवाती केल्यात तशेंच दक्षीण गोंयांत जर दुसरें वैजकी कॉलेज आमचे मानेस्त मुखेलमंत्री डॉ. प्रमोद सावंत हांणी केल्ले घोशणे प्रमाण जालें तर सुवातो वाडटल्यो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
