भांगरभूंय | प्रतिनिधी
अजून एकल्यानूय घेवंक ना स्वेच्छा निवृत्ती; 169 जाणांचेर संकश्ट
भांगरभूंय । प्रतिनिधी
फोंडें: संजिवनी साकर कारखान्याचें स्पश्ट धोरण अजून सरकारान स्पश्ट करूंक नाशिल्ल्यान ऊस उत्पादका उपरांत कामगारांचो प्रस्न गंभीर जाला. 30 सप्टेंबर मेरेन कामगारांक दवरपाची मुजत सोंपतली. ते उपरांत कामगारांक घरा धाडपाची शक्यताय वाडल्या. खूब वर्सांच्यान कारखान्यांत काम केल्ल्या कामगारांक हेर सुवातेर काम मेळप कठीण जाल्ल्यान सरकाराच्या धोरणा विशीं कामगार हुस्को उक्तायतात.
संजिवनी साकर कारखान्यांत 91 कायमस्वरुपी जाल्यार 78 दीसवड्याचेर काम करतात. ह्या कामगारांचो प्रस्न गंभीर जाला. शेतकी खात्यान हे आदीं कामगारांक स्वेच्छा निवृत्ती जाहीर केल्ली, पूण अजून मेरेन एकाय कामगारान स्वेच्छा निवृत्ती घेवपाचो निर्णय घेवंक ना. 30 सप्टेंबराक कामगारांक दिल्ली मुजत सोंपता. ते उपरांत कामगारांच्या फुडाराचो प्रस्न निर्माण जातलो. 1 ऑक्टोबराच्यान कामगारांक घरा धाडपाचो भंय संजिवनीच्या कामगारांक दिसपाक लागला.
फाटल्या कितल्याश्याच वर्सांच्यान कामगार संजिवनी कारखान्यांत काम करतात. सरकारान कामगारांच्या प्रस्नाचेर उपाय काडूंक नाशिल्ल्यान तांचे कुटुंब अर्थीक संकश्टांत सांपडटलें. पिरायेची मर्यादा हुपिल्ल्यान कामगारांक दुसरे कडेन काम मेळप कुस्तार जातलें. ते खातीर कामगारांक हेर खात्यांनी आस्पावन घेवपाचो पर्याय सरकारा मुखार उबो रावला. ना जल्यार कामगारांच्या प्रस्ना वयल्यान तणाव निर्माण जावपी शक्यताय उक्तायतात.
हे आदीं सरकारान संजिवनी साकर कारखान्याच्या कामगारांक बांदकाम, शेतकी आनी उदकास्रोत खात्यांत आस्पावन घेवपाची प्रक्रिया सुरू केल्ली. तेन्नाचे बांदकाम मंत्री दीपक पाऊसकार हांणी लेगीत कामगारांचो प्रस्न सुटावो करपाचो यत्न केल्लो.
धारबांदोडेंचे सरपंच विनायक उर्फ बालाजी गांवस हांणी हे आदीं कामगारांक घेवन मुख्यमंत्री डॉ. प्रमोद सावंत हांचे कडेन चर्चा केल्ली. संजिवनी साकर कारखान्याचे प्रशासक राजेश देसाय हांचो कामगारां विशीं अजून नवो आदेश येवंक ना. कामगारांनी अजून मेरेन स्वेच्छा निवृत्ती घेवंक ना. तांकां दिल्ली मुजत 30 सप्टेंबराक सोंपता. कामगारा विशीं सरकारूच निर्णय घेतलें, अशें तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
