भांगरभूंय | प्रतिनिधी
जोजफ सिक्वेराः टाटा ग्रुपाचे टाटा ट्रेन्स कंपनीची घेतले मजत
भांगरभूंय । प्रतिनिधी
म्हापशें: कळंगूटे बोडके वड वाठारांत पंचायती वतीन टाटा ग्रुपाचे टाटा ट्रेन्स हे कंपनीचे मजतीन संयुक्त उपक्रमा खाला मार्केट कॅम्प्लेक्स आनी बस स्टॅण्ड बांदपाचो प्रस्ताव आसा. थळावे लोक आनी जमनीचे धनी तशेंच कूळ हांकां विस्वासांत घेवनूच हो प्रकल्प बांदतले. ह्या प्रकल्पा खातीर सरकारी प्रशासना वतीन गरजेची परवानगी मेळ्ळ्या, अशी म्हायती सरपंच जोजफ सिक्वेरा हांणी दिली.
शुक्रारा 20 सप्टेंबराक पंचायत घरांत घेतिल्ले पत्रकार परिशदेंत सरपंच सिक्वेरा उलयताले. तांचे वांगडा उपसरपंच गीता परब, पंचायत सचीव अर्जून वेळीप तशेंच आदले आनी सध्याचे पंच हाजीर आशिल्ले.
सिक्वेरा हांणी सांगलें, कळंगूटे व्हड मार्केट कॉम्प्लेक्स आनी बस स्टॅण्ड जावचो हें आपलें सपन आशिल्लें. आतां 20 वर्सांनी तें पुराय जावपाच्या मार्गार आसा. हे खातीर आमी बोडके वड वाठारांतल्या पॅट्रोल पंपा लागसारची सर्वे नं. 469/5 ते 29 तली 16,300 चौखण मिटर आनी सर्वे नं. 471/5 ते 22 तली 18,500 चौखण मिटर अशी 34 हजार 800 चौखण मिटर जमीन निश्चीत केल्या. ह्या प्रकल्पा खातीर परवानगी दिवन नगर नियोजन खात्यान जमनीच्या झोनांत गरजेचो बदल केला, अशें सिक्वेरा हांणी सांगलें.
ह्या प्रकल्पा खातीर 2004 त आर्किटेक्ट तुलिओ डिसोझा हांणी आराखडो तयार केल्लो. सरकारी खात्यांचो परवानोय मेळिल्लो, पूण कांय अडचणी तशेंच पयशांचे समस्येक लागून हो प्रकल्प प्रलंबीत उरिल्लो. आतां टाटा ग्रुपाचे टाटा ट्रेन्स कंपनीन हो प्रकल्प उबारचे खातीर आदार दिवपाचें मान्य केलां. थळाव्या लोकांक विस्वासांत घेवन संयुक्त उपक्रमा खाला (जॉयंट व्हेंचर) प्रकल्प उबारपाचो प्रस्ताव दिला, अशें सिक्वेरा हांणी सांगलें. पंचायत मंडळान ह्या प्रस्तावा प्रमाण प्रकल्पाक चालना दिवपाचो एकमतान निर्णय घेतला. पूण शेतकार आनी थळाव्या लोकांक विस्वासांत घेवनूच आमी फुडें वतले. ते खातीर आमी हो प्रस्ताव ऑक्टोबर- नोव्हेंबरांत ग्रामसभेंत दवरतले. लोकांक जाय जाल्यारूच हो प्रकल्प जातलो आनी नाका जाल्यार आमी फुडली प्रक्रिया सुरू करचे नात. लोकांच्या हिता आड पंचायत मंडळाक वचपाचें ना, अशें सिक्वेरा हांणी स्पश्ट केलें.
कळंगूटे सयत हडफडें, कांदोळी, साळगांवाक फायदो
हो मार्केट प्रकल्प मुखेल सुवातेर आसा. कळंगूटे सयत हडफडें, कांदोळी, साळगांवच्या लोकांक ताचो फायदो जातलो. सध्याचें मार्केट आडखळीचे थारता. ह्या मार्केट आनी बसस्टॅण्ड प्रकल्पांत गाडयां खातीर पार्किंगेची व्हड सुवात आसतली. तशेंच पंचायत घर आनी हेर सरकारी आस्थापनांची थंय वेवस्था करतले. थळाव्या लोकांची मान्यताय मेळ्ळे उपरांतूच प्रकल्पाचो आराखडो कंपनी कडल्यान तयार जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
