दुर्बळ घटकां मेरेन फुकट कायदो सेवा पावची

भांगरभूंय | प्रतिनिधी

अ‍ॅड. शिवाजी देसायः वाळपय ग्राम न्यायालय, नेण्टे भुरगीं गाडयो चलयतात म्हूण हुस्को

भांगरभूंय । प्रतिनिधी

वाळपयः भारतांत अजुनूय व्हड प्रमाणांत गरिबां, आदार नाशिल्ल्यांक, अनाथ आशिल्ल्यांक न्यायालयांत लडप अर्थीक नदरेन परवडना. कायद्याचे नदरेन सगळ्यांकूच समानतेचो अधिकार आसा. देशांतले दरेके व्यक्तीक ताची कायदेशीब बाजू समानतायेन न्याय वेवस्थे मुखार मांडपाक मेळची, हेच खातीर देशांतल्या दुर्बळ घटकां मेरेन फुकट कायदो सेवा पावची. हे खातीर विधी सेवा प्राधिकरण कायदो संमत केलो. हाकाच लागून देशांतल्या दरेका दुर्बळ घटका मेरेन फुकट कायदो सेवा पावप गरजेचें आसा, अशें अ‍ॅड. शिवाजी देसाय हांणी सांगलें. वाळपयच्या नगरपालिका सभाघरांत आयोजीत केल्ल्या ग्राम न्यायालयाच्या उक्तावण सुवाळ्याच्या दुसर्या सत्रांतले कार्यावळींत ते उलयताले.

ह्या वेलार माचयेर उत्तर गोंय जिल्हो कायदो सेवा प्राधिकरणाची सचीव शांताश्री सिनाय कुडचडकार, समाज कल्याण खात्याचे क्षेत्र सहाय्यक शशीकांत नार्वेंकार, भिंगो गांवस उपस्थीत आशिल्ले.

अ‍ॅड. देसाय हांणी सांगलें, 1977 त घटना दुरुस्ती करून फुकट कायदो सेवा हे नदरेन घटनेचें कलम 39 अ तयार केलें. तेच नदरेन 1987 त दुर्बळ घटकांक फुकट कायदो सेवा मेळची हे खातीर विधी सेवा प्राधिकरण कायदो अस्तित्वांत आयलो. ह्या कायद्याच्या कलम 12 प्रमाण अनुसुचीत जाती आनी अनुसुचीत जमातीचे वांगडी, मानवी तस्करीचे बळी, बायलो, 18 वर्सां पिराये सकयलीं भुरगीं, दिव्यांग व्यक्ती, उद्देगीक कामगार, कैदी, सामुहीक आपत्तीचे पिडीत, जे राष्ट्रीय सेवा प्राधिकरणा प्रमाण उत्पन्नाचे भितर आसात, अशा लोकांक फुकट कायदो सेवा मेळटा. जांकां फुकट कायदो सेवेची गरज आसा, तांचे खातीर संबंदीत न्यायालयांत ते खातीर वेवस्था केल्या. थंय वचून तांणी अर्ज करपाक जाय.

फुकट कायदो सेवे खातीर अर्ज करतना अर्जांत फटीची म्हायती दिवन चलना. तशी ती सांपडली जाल्यार ख्यास्त जावं येता. न्यायालयांत वकील बाजू मांडटा ती आपल्या अशिला खातीर. तसोच दुसरे वटेंतलो वकील आपल्या अशिलाची बाजू मांडटा. वैयक्तीक तरेन ताचो कसलेच तरेचो संबंद आसना. वकिली पेशा हो एक म्हान पेशा. दरेका मनशाक आपली बाजू मांडपाचो अधिकार आसा. गरजे भायर कोणेच वकिलांक दोश दिवचो न्हय, अशें अ‍ॅड. देसाय हांणी सांगलें. आमच्या देशांत आतंकवादी कसाबाक लेगीत फुकट कायदो सेवा खाला वकील दिल्लो. आमची न्यायवेवस्था सक्षम आसा, हाचीच ही देख, हें दरेकल्यान मतींत दवरचें, अशेंय तांणी सांगलें.

18 वर्सां पिराये सकयलीं बुरगीं गाडी चलयतना सांपड्यार ताच्या पालकांक दंड जावपाक शकता, हें अ‍ॅड. देसाय हांणी मुजरत सांगलें.

शशीकांत नार्वेंकार हांणी समाज कल्याण विभागांत अनुसुचीत जामातींक उपलब्ध आशिल्ल्या येवजण्यांची म्हायती दिली.

समाज कल्याण विभागांत आदिवासी लोकांक उपलब्ध आशिल्ल्या येवजण्यां विशीं भिंगो गांवस  हांणी म्हायती दिली. अ‍ॅड. प्रज्ञा सावयकार हांणी सुत्रसंचालन केलें. शांताश्री सिनाय कुडचडकार हांणी उपकार मानले.