भांगरभूंय | प्रतिनिधी
चेन्नय, खबरां संस्था: भारतीय पंगडान दोन मॅचींतले पयले टेस्ट मॅचींत बांगलादेशाचेर वट्ट २८० धावड्यांनी जैत मेळयलां. भारतान बांगलादेशाक ५१३ धांवड्यांचें आव्हान दिल्लें. २३४ धावड्यांचेर बांगलादेशाचो डाव सोंपलो. रविचंद्रन अश्विनच्या ६ विकेटी घेवन भारतान जैत मेळोवन दिलें.
भारत आनी बांगलादेश हांचे मदली पयली टेस्ट मॅच टीम इंडियान सहज जिखली. भारताच्या जैतांत आर अश्विनची भुमिका महत्त्वाची आशिल्ली. आर अश्विनान पयल्या डावांत शेंकडो मारलो आनी दुसर्या डावांत ६ विकेटी घेवन भारताक इतिहासीक जैत मेळोवन दिलें.
हे मॅचींत बांगलादेशान टॉस जिकून पयलीं बॉलींग करपाचो निर्णय घेतलो. भारतान पयलीं बॅटींग करून ३७६/१० धांवड्यो केल्यो. आर अश्विन हांणी १३३ बॉलांनी ११ चवके आनी २ सके मारून ११३ काडले. उपरांत पयल्या डावांत बॉलिंगे खातीर आयिल्ल्या बांगलादेशान ४७.१ बॉलांनी १४९ धांवड्यो काडल्यो. जसप्रीत बुमराह हांणी भारता वतीन सगळ्यांत चड ४ बळी घेतले. उपरांत टीम इंडियान दुसर्या डावांत बॅटींग करपाक देंवली आनी २८७/४ धांवड्यो काडल्यो.
शुभमन गिलान १७६ बॉलांनी १० चवके आनी ४ सके मारून ११९ काडले. तशेंच ऋषभ पंतान १२८ बॉलांनी १३ चवके आनी ४ सक्यांचे मजतीन १०९ धांवड्यो काडल्यो. डाव घोशीत केल्या उपरांत भारतीय संघान बांगलादेशाक ५१५ धावड्यांचें लक्ष्य दिलें. पूण तांचो दुसरो डाव २३४ धांवड्यांचेर सोंपलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
