भांगरभूंय | प्रतिनिधी
गोंय प्रदुशण नियंत्रण मंडळान चार युनिटां आड केली कारवाय
भांगरभूंय । प्रतिनिधी
मडगांवः कुंकळ्ळे आयडीसींतल्या प्रदुशणाचे समस्येक लागून थळावे लोक तापल्यात. गोंय प्रदुशण नियंत्रण मंडळान जिल्होधिकार्यांच्या सुचोवण्यां प्रमाण शुक्रारा दोन युनीट बंद केलें. जाल्यार शेनवारा इंडोटेक आयस अँड कोल्ड स्टोअरेज आनी संवसारीक पांवड्यार गोंयची सिंगल माल्ट व्हिस्की तयार करपी फामाद मे. जॉन डिस्टिलरी कंपनीक नोटीस जारी करून युनीट बंद करपाक सांगलें.
कुंकळ्ळे उद्देगीक वसणुकेंतल्या प्रदुशणाचो प्रस्न जायत्या म्हयन्या सावन तापलां. हाचे पयलीं सरकार कारवाय करतले अशें सांगून लेगीत कुंकळ्ळे उद्देगीक वसणुकेंतल्या प्रकल्पांतल्यान प्रक्रिया करूंक नाशिल्लें उदक उक्ते सुवातेर सोडटाले. हाका लागून उदकाचे स्रोत प्रदुशीत जावपाक लागले. शुक्रारा उपजिल्होधिकाऱ्यान थळाव्या आमदारां सयत कुंकळ्ळे उद्देगीक वसणुकेंतल्या प्रदुशणाची पळोवणी केली. वेगवेगळ्या युनिटांतल्यान प्रक्रिया करूंक नाशिल्ल्या उदकाक लागून उदका स्रोत प्रदुशीत जातात, अशें दिसून आयलें. हें विशींचो अहवाल उपजिल्होधिकाऱ्यान आपत्कालीन वेवस्थापन खात्याचे अध्यक्ष आनी जिल्होधिकारी अश्वीन चंद्रू हांचे कडेन सादर केलो. उपरांत जिल्होधिकारी चंद्रू हांणी गोंय प्रदुशण नियंत्रण मंडळाक नेमांचें उल्लंघन करपी, तशेंच पर्यावरण आनी मनशाचे भलायकेक धोको निर्माण करपी युनिटांचेर कारवाय करून अहवाल सादर करपाचो आदेश दिलो. उपरांत गोंय राज्य प्रदुशण नियंत्रण मंडळान क्वालिटी फूड्स आनी युनायटेड मरीन प्रोडक्ट्स ह्या दोन युनिटांक कारणा दाखयात नोटीस जारी करून काम बंद करपाचो आदेश दिलो. शेनवारा गोंय प्रदुशण नियंत्रण मंडळान आनीक दोन युनिटांक कारणां दाखयात नोटीस जारी केल्या. 26 सप्टेंबराक सकाळीं 11 वरांचेर साळगांवच्या कार्यालयांत हजर रावून युनीट कित्याक बंद करचो न्हय हाचें स्पश्टीकरण दिवचें. ते मेरेन युनीट बंद दवरपाचे निर्देश दिले. हातूंत झेल तयार करपी इंडोटेक आयस अँड कोल्ड स्टोअरेज आनी जॉन डिस्टिलरी कंपनीक नोटीस जारी केली. संवसारीक पांवड्यार पाविल्ली पॉल जॉन सिंगल माल्ट व्हिस्की तयार करपी मे. जॉन डिस्टिलरी कंपनीक प्रदुशण केल्ल्यान काम बंद करपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
