भांगरभूंय | प्रतिनिधी
नवी दिल्ली, खबरां संस्था ः 5 हजार वरां वयर उड्डाणाचो अणभव आशिल्ले एअर मार्शल अमर प्रीत सिंग हे एअर चीफ मार्शल विवेक राम चौधरी उपरांत भारतीय हवाई दळाचे फुडले मुखेली जातले. सध्या तें हवाई दळाचे उपमुखेली म्हणून काम करतात. सिंग 30 सप्टेंबराक दनपारां दळाचो कारभार स्विकारतले अशें संरक्षण मंत्रालयान सांगलां.
एअर चीफ मार्शल चौधरी 30 सप्टेंबराक सेवेंतल्यान निवृत्त जातले. सिंग हाका डिसेंबर 1984 त भारतीय हवाई दळाच्या फायटर पायलट स्ट्रीमांत नेमलो. सुमार 40 वर्सांच्या सेवेच्या काळांत तांणी वेगवेगळ्या कमांड, कर्मचारी, निर्देशात्मक आनी परदेशांतल्या नेमणुकांनी काम केलें.
पांच हजार वरां परस चड उड्डाणाचो अणभव
अमर प्रीत सिंग हे नॅशनल डिफेन्स अकादेमी, डिफेन्स सर्विसेस स्टाफ कॉलेज आनी नॅशनल डिफेन्स कॉलेजीचे आदले विद्यार्थी आसून तें पात्र उड्डाण प्रशिक्षक आनी प्रायोगिक चांचणी पायलट आसा. वेगवेगळ्या प्रकारच्या स्थिर आनी रोटरी-विंग विमानांचेर तांकां पांच हजार वरां परस चड उड्डाणाचो अणभव आसा. तांणी ऑपरेशनल फायटर स्क्वॉड्रन आनी फ्रंटलायन एअर बेसाचे फुडारपण केलां.
चांचणी पायलट म्हणून तांणी मॉस्कोंतल्या मिग-29 अपग्रेड प्रोजेक्ट मॅनेजमेंट पंगडाचें फुडारपण केलें. तशेंच राष्ट्रीय उड्डाण चांचणी केंद्रांत प्रकल्प संचालक (उड्डाण चांचणी) आशिल्ले आनी तेजस ह्या हलक्या झुजारी विमानाची उड्डाण चांचणी करपाचें काम तांकां दिल्लें.
एअर मार्शल सिंग हांणी साउथ वेस्टर्न एअर कमांडांत एअर डिफेन्स कमांडर आनी इस्टर्न एअर कमांडांत वरिश्ठ हवाई कर्मचारी अधिकारी ह्या म्हत्वाच्या कर्मचाऱ्यांच्यो नेमणूक केल्या. हवाई दळाच्या उपमुख्यपदाचो कारभार घेवचे पयलीं ते केंद्रीय हवाई कमांडांत एअर ऑफिसर कमांडिंग-इन-चीफ आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
