भांगरभूंय | प्रतिनिधी
आंतरराश्ट्रीय कामगार संघटनेचो अहवाल
नवी दिल्ली, खबरां संस्था ः सादारणपणान 9 ते 5 हो ऑफिसाचो वेळ आसता. पूण एक एकदा काम इतलें आसता की चड वेळ रावून तें करचें पडटा. ही परिस्थिती जायत्या देशांत आसा जंय लोक ओव्हरटायम काम करतात. मजगतीं, आंतरराष्ट्रीय कामगार संघटनेन हालींच हे संबंदी एक आंकडेवारी जाहीर केल्या, तातूंत भारता सयत हेर देशांतले नागरिक सप्तकांत सरासरी कितले वरां काम करतात हाची म्हायती दिल्या.
आंतरराश्ट्रीय कामगार संघटनेच्या अहवाला प्रमाण सगळ्यांत चड तास काम करपी पयल्या 10 देशांच्या वळेरेंत भूतान पयल्या क्रमांकाचेर आसा. भूताना उपरांत भारत दुसरो आनी बांगलादेश तिसरें क्रमांकाचेर आसा. हाचे भायर पाकिस्तान सातव्या क्रमांकाचेर आसा. भूतानाचे 61 टक्के नागरिक सप्तकांत सरासरी 49 वरां परस चड काम करतात. जाल्यार भारतांतले नागरीक सप्तकांत सरासरी 46.7 वरां काम करतात. तशेंच सप्तकांतले 49 वरां वा ताचे परस चड काम करपी 51 टक्के नागरिक भारतात आसात. ते भायर बांगलादेशांतले 47 टक्के नागरिक 49 वा ताचे परस चड वरां काम करतात. जाल्यार 40 टक्के पाकिस्तानी नागरिक 49 वा चड वरां काम करतात.
म्हत्वाचें म्हणल्यार आंतरराश्ट्रीय कामगार संघटनेच्या हे वळेरेंतल्या पयल्या 10 देशां मदीं दक्षीण आशिया देशांचो आस्पाव आसा. हाचे वयल्यान ह्या देशांतले नागरीक ओव्हरटायम काम करतात हें स्पश्ट जाता. ते भायर अरुबांतले नागरिक सरासरी 39.4 वरां काम करतात. चीनाचे नागरीक 46.1 वरां, क्रोएशियाचे नागरीक 37.9 वरां, जॉर्जियाचे नागरीक 40.5 वरां, जर्मनीचे नागरीक 34.2 वरां, आयल ऑफ मॅनचे नागरीक 35 वरां, जपानाचे नागरीक 36.06 वरां, न्यू जर्सीचे नागरीक 40 वरां आनी सिंगापूरचे नागरीक सरासरी 42.6 वरां काम करतात अशें ह्या अहवाला म्हणलां.
खंयच्या देशाचे नागरीक सगळ्यांत उणें काम करतात?
आंतरराश्ट्रीय कामगार संघटनेच्या आंकडेवारी प्रमाण कांय देश अशेय आसात, जंय नागरिक 49 वरां वा ताचे परस उणें काम करतात. अशा देशांच्या वळेरेंत वानुअतु पयल्या क्रमांकाचेर आसा. ह्या देशांतले नागरीक सप्तकांत सरासरी 24.7 वरां काम करतात. ते भायर किरिबाटीचे नागरीक सप्तकांत सरासरी 27.3 वरां, फेडरेटेड स्टेट्स ऑफ मायक्रोनेशियाचे नागरीक सप्तकांत सरासरी 30.4 वरां, युरोपांतले नेदरलँड्साचे नागरीक सरासरी 31.6 वरां, जाल्यार नॉर्वेचे नागरीक सरासरी 33.7 वरां काम करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
