भांगरभूंय | प्रतिनिधी
म्हापशें: घाटेश्वरनगर, खोर्ले हांगासरल्या डीएमसी कॉलेजी कडेन वचपी मुखेल रस्त्याचे कुशीक बेकायदो बांदिल्ल्या वट्ट 22 दुकानांक म्हापशें पालिकेन नोटीस दिवन हीं दुकानां बंद केल्यांत. जाल्यार तातूंतलीं आठ दुकानां मातयेभरवण करपाचो आदेशूय पालिकेन दिला.
खोर्ली ते आसगांव मजगतच्या रस्त्याचे कुशीक घाटेश्वरनगरांत कोमुनिदीदीचे सुवातेंत पालिकेचो परवानो घेनासतना अवैद्यरितीन दुकानां बांदिल्लीं. तातूंत बेकायदो वेवसाय सुरू केल्ल्याचें पालिकेचे नदरेक आयिल्लें.
तेप्रमाण पालिका मुख्याधिकारी चंद्रकांत शेटकार हांणी हीं दुकानां बंदिल्ल्या रंझान अली शेख, तबसूम बेपारी, फिरीद खान, हमन अली, संतोष गावडे, रतीश किनळकार, सिध्देश अंम्रे, अब्दुल्ला खान, स्वप्नील आराबेकार, मनिषा मेथर, दादा च्यारी, मार्कुस मार्टीन्स, वेन्सी मार्टीन्स, व्हिक्टर जेम्स मार्टीन्स हांचे सयत हेर अनवळखी मेळून वट्ट 22 जाणांची दुकानां बंद करपाचे निर्देश पालिका अभियंतो आनी निरिक्षकांनी दिल्यात. ते प्रमाण शुक्रारा सकाळीं नगरपालिकेच्या पंगडान ह्या सगल्या दुकानांक कुलप लायलें.
मजगतीं, म्हापशें पालिका वाठारांत मुखेल तशेंच भितरल्या रस्त्यांचेर मेळून हजारां परस चड बेकायदो रितीन दुकानां बांदून तातूंत अवैद्यपणान वेवसाय सुरू आसा. हीं दुकानां रस्तो रुंदीकरण, तशेंच येरादारीक आडखळी निर्माण करतात. अलंकार थिएटर वाठारांतल्या कांय इमारतींनीय अवैद्यपणान फास्टफुडाचो वेवसाय सुरू केला. पालिके कडल्या ह्या दुकानांचेर लेगीत कारवाय जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
