भांगरभूंय | प्रतिनिधी
आयज अल्झायमर दीस. ते निमतान विशेश.
अल्झायमर हें मेंदवा कडेन संबंदीत दुयेंस. तें चडशें पळोवपाक गेल्यार पिरायेची साठी हुपिल्ल्या लोकांक जावपाची चड शक्यताय आसता. हो एक डिमेंशियाचो प्रकार. ताका लागून मनश्याच्या मेंदवाचेर परिणाम जावपाक शकता. दिसपट्टे जिणेंत आडमेळीं येवपा इतली याद विसरप, समस्या सोडोवपाची, विचार करपाची शक्त उणी जावप, अशे प्रकार ह्या दुयेंसाक लागून घडटात.
डिमेंशियाची पयलीं अवस्था म्हळ्यार याद/ उगडास दवरपाक त्रास जावप. उदाहरण सांगपाचें जाल्यार हालींच घडिल्ल्या गजालींची याद उरप ना, चावी, वक्ल खंय दवरलां ती याद उरप ना. चड करून मेंदवाक नुकसान करपी रोगांक लागून हें जाता. रक्तातले साकरेचें प्रमाण वाडप, वजन कमी वा चड जावप, समाजीक नदरेन एकसुरीपणान रावप, उलोवपांत बदल जावप अश्या खुबश्या कारणांक लागुन डिमेंशिया जावपाची शक्यताय आसता. सध्या देशांत सादारण 50 लाख डिमेंशियाचे दुयेंती आसात. समाजीक, अर्थीक तशेंच धार्मिक/ सांस्कृतिक बाबतीन अशें कसलेंच बंधन ह्या दुयेंसाक ना. हे दुयेंस कोणाकूय जावं येता.
मानसोपचार तशेंच न्यूरोलाॅजिस्ट ह्या दुयेंसाचेर उपाय करतात. हे दुयेंस तपासपाक एमएमएससी नांवाची एक तपासणी करून एके प्रस्नावळीच्या आधाराचेर जाणून येता की डिमेंशिया आसा काय ना ती. अल्झायमर हे दुयेंस पळोवपाक गेल्यार पुराय बरें जावपाक शकना, पुण वखंदानी काय प्रमाणात बरो परिणाम दिसून येता. अल्झायमरान जशी मनशाची पिराय वाडत वता तसतसो ताच्या मेंदवाचो आकार ल्हान ल्हान जायत वता. मनश्याच्या मेंदवातली वाळी बारीक जायत वता. सांगपाचे म्हळ्यार हे दुयेंस जाण्ट्या लोकांक जावपाची चड शक्यताय आसता,
ताका लागून दर एका मनश्यान पिरायेच्या पन्नासाव्या वर्सां उपरांत दर स म्हयन्यानी एकदा तपासणी करून घेवप गरजेचें. हातून लिव्हर, किडनी प्रोफायल , विटामिन बी 12, विटामिन डी ची तपासणी करून दोतोराचो सल्लो घेवपाची खरेंच गरज आसा. अशा दुयेतीक बारिक सारीक गजालीचो विसर पडटा. सांगपाचें म्हणल्यार एक हजार बरयताना ताचेर कितले शून्य दिवप हें कळना, केन्ना लोकांची नावा विसरप, बऱ्या गजालीचेर निराश दिसप, कसल्याच कामांत वांटेकारी जावप ना अश्यो गजाली तुमच्या सामकारा आयल्यो जाल्यार बेगीनल्या बेगीन दोतोरांक मेळप गरजेचें.
डिमेंशिया वा अल्झायमर जाल्लो मनीस स्वता सगलें विसरत आसता. ताका लागून ताच्या लक्षांत कायच उरना. अश्या वेळार तुम्ही तांचेर उपाय/ उपचार केलेनात जाल्यार त्या मनश्याच्येर अत्याचार केल्ले सारको जातलो. देखून ताचेर बेगीन उपचार करून ताका एक बरें जीवन जगपाक उत्साहीक करात.
डिमेंशिया जावपाक जायना म्हणून दिसपट्टे जिणेंत कांय बदल करप म्हत्वाचें. ताका लागून तुमी हें दुयेंस पयस दवरपाक शकतात. पयलें म्हळ्यार काळीज निरोगी दवरात, चड न्हीद घेयात, व्यायाम करात, अर्द वर तरी वेगान चलात. आयज अल्झायमर दीस. कुज मेंटल हेल्थ फावडेशना वतीन बस्तोड्यां दर वर्सा उमेदीन तो मनयतात.
– बाळकृष्ण पी. मालवणकार
9922385510
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
