भांगरभूंय | प्रतिनिधी
पणजी ः कांय म्हयन्यां आदीं सरकारान 150 कोटी रुपया खर्च करून कुडचड्यां लागसार नवो कोयर प्रक्रिया प्रकल्प उबारलां. तरी लेगीत कुडचड्यार मुखेल शारांतच अजून कोयराचे वर्गीकरण जाता. हाका लागून थळाव्यांक भलायकेचे त्रास जावपाक लागल्यात. येत्या बुधवार मेरेन वर्गीकरणाची सुवात बदलली ना जाल्यार थळाव्या आमदाराच्या घरा मुखार कोयर उडयतले अशी शिटकावणी काँग्रेस प्रदेशाध्यक्ष अमित पाटकार हांणी दिल्या.
शुक्रारा पाटकार हांणी थळाव्या लोकां सयत घन कोयर वेवस्थापन मंत्री बाबूश मोन्सेरात हांकां हे संबंदी निवेदन दिलें. हाचे उपरांत पाटकार हांणी प्रसार माध्यमां कडेन संवाद सादलो. तांणी सांगलें, फाटल्या कांय वर्सां सावन कुडचड्या शारांतल्या नागरी वस्तीत कोयर उडयतात. हांगाच्या इगर्जेक आनी शाळें कडेन वचपी हो मुखेल रस्तो. सांगें, सावड्डें हांगाच्यान येवपी लोकूय हो रस्तो वापरतात. थळाव्या आमदाराचें घर हांगाच्यान फकत 100 मीटर अंतराचेर आसा.
अशें आसून लेगीत भर वस्तींत कोयर उडयतात आनी ताचे वर्गीकरण करतात. हाका लागून हांगा डेंग्यू सारकिल्ले दुयेंस वाडत आसात. हे संबंदी आमी काल भलायकी अधिकारी आनी पुलिसांक थळार आपयले. तेन्ना भलायकी अधिकाऱ्यांनी लेगीत हें चुकीचे आसून असो कोयर उडोवचो न्हय असो सल्लो दिलो. हाचे उपरांत पालिका प्रशासनान हांगाचो सगळो कोयर काडिल्लो. पूण सांजवेळा पांच वरांचेर थंय परतून कोयर उडयलो.
हाकाच लागून आमी आयज भलायकी आनी शार उदरगत मंत्री हांकां मेळपाक आयिल्लें. पूण तें मंत्रालयात नाशिल्ले. सामान्य लोकांच्यो समस्या आयकून घेवपाक मंत्री हजर ना ही दुर्दैवी गजाल. हाचे उपरांत आमी घन कोयर वेवस्थापन मंत्र्याक मेळ्ळे. तेंन्ना हांतूत लक्ष घालतले अशें आश्वासन तांणी आमकां दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
