भांगरभूंय | प्रतिनिधी
पेडणें, प्रतिनिधी: मालपेंचो राष्ट्रीय महामार्ग ६६ चेर पडल्लीं पालसणां बेगोबेग काडून हो रस्तो येरादारी खातीर उक्तो करचो. पयलींच्या रस्त्याचे अवस्थेक लागून वाहन चालकांक बरेच त्रास सोंसचे पडटात. हो आदलो रस्तो पुरायेन फोंडकुलांनी भरला. ताका लागून सरकारान आनी संबंदीत खात्यान हाचे कडेन लक्ष घालून बेगोबेग हीं फोंडकुलां पुरोवचीं अशी मागणी वाहना चालकांनी केल्या.
जून म्हयन्यांत राष्ट्रीय म्हामार्ग ६६ मालपें बायपास रस्त्यार पालसणां कोसळिल्लीं. हीं पालसणां कोसळिल्ल्यान फाटल्या तीन म्हयन्यां सावन हो रस्तो येरादारी खातीर बंद आशिल्लो. पर्यायी रस्तो म्हणून जो आदलो राष्ट्रीय म्हामार्ग १७ एन. एच आशिल्लो, सध्या त्या रस्त्यान येरादारी वळयल्या. मात हो रस्तो पुरायेन धोको निर्माण करपी आसून लेगीत त्याच रस्त्यावेल्यान सगळे तरेची येरादारी सुरू केल्या. कोसळिल्ल्या ह्या पालसणांचेर सरकारान काम करपा कडेन आड नदर केल्या वा कंत्राटदारान काम करपा कडेन निश्काळजीपणां दाखयल्यां.
हे विशीं थळाव्या नागरिकांनी सरकाराक निवेदन दिलें. दिसाळ्यांतल्या खबरां वरवीं आवाज काडलो. उपरांत सरकारान दखल घेवन ह्या रस्तो बांदकाम कंपनीच्या कंत्राटदाराक ह्या रस्त्यावेलीं पालसणां पयस करपाच्यो सुचवण्यो दिल्यो.
मात पळोवणी करून लेगीत हो रस्तो येरादारी खातीर उक्तो करपाक सरकार आनी संबंदीत यंत्रणेक अपेस आयलां. ताका लागून वाहन चालकांनी आनी थळाव्यांनी तिडक उक्तायल्या. सरकार असंवेदनशील आशिल्ल्याचोय आरोप जायत्या जाणांनी केला.
मुख्यमंत्री डॉ. प्रमोद सावंत हांणी हालींच रस्त्यार पडिल्ल्या फोंडकुलांचेर अभियंते कंत्राटदार कारवाय करतले अशें जाहीर केल्लें. मागीर एम. व्ही. आर कंपनीन तयार केल्लो पत्रादेवी ते धारगळ मेरेनच्या राष्ट्रीय म्हामार्ग ६६ चेर धोको निर्माण करपी पालसणां कोसळून भौशीक लुकसाण जाता ताचेर सरकार केन्ना कारवाय करतलें? असो प्रस्न उदय महाले आनी हेर थळाव्यांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
