भांगरभूंय | प्रतिनिधी
पणजी : जायत्या रस्तो अपघातांक कारण थारतात ते म्हळ्यार बेजबाबदार वाहन चालक. हे कश्याकशेंय गाडी चलोवन आपले वांगडा हेरांचोय जीव धोक्यांत घालतात. अश्याच बेजबाबदार चालकांचें उदाहरण आयज सकाळीं सुमार ९.१५ वरांचेर आदल्या मांडवी पुलाचेर पळोवपाक मेळ्ळें.
चड म्हायती प्रमाण, पणजेच्यान पर्वरे वटेन वचपी मारुती सुझुकी बोलेनोच्या ड्रायव्हरान ओव्हरटेक करपाचो यत्न करतना दोगां दुचाकी चालकांक धपको दिलो. ह्या अपघातांत दुचाकी चालक आनी एकटी बायल जखमी जाली. तांकां लागींच्या हॉस्पिटलांत उपचारा खातीर व्हेल्ल्याची म्हायती मेळ्ळ्या.
मजगतीं, पर्वरी ते पणजे मेरेनच्या म्हामार्गाचेर कसलोय अपघात जाल्यार हांगा रोखडीच येरादारी कोयंडी जातना दिसता. आयज सकाळीं नेमको लोकांच्या कामाक वचपाच्या वेळार हो अपघात जाल्ल्यान पणजे आनी पर्वरीच्या रस्त्यार येरादारीची कोयंडी जाल्ली. पुलीस घडणुके सुवातेर पावले उपरांत येरादारी सुरळीत केली. हे विशीं पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
