भांगरभूंय | प्रतिनिधी
जो मेरेन आदलो इन्सेंटिव्ह दर मेळना, तो मेरेन काम बंद
मडगांव, प्रतिनिधी : स्विगी ह्या ऑनलायन जेवण पावोवपी सर्व्हीसेंतल्यान स्विगी रायडर्सांक मेळपी इन्सेंटिव्ह उणो केला. हेच फाटभूंयेर दक्षीण गोंयचे सुमार १०० रायडर्सांनी काम बंद दवरलें आनी जो मेरेन आदलो दर दिना तो मेरेन काम करचे नात अशें धोरण तांणी स्विकारलां.
रायडर्स मडगांवच्या कार्यालया लागसारा एकठांय जाले. ह्या वेळार रायडर्सांक मेळपी इन्सेंटिव्ह कसलेच तरेची सुचवणी दिनासतना उणो करपाच्या प्रकाराचेर तांणी तिडक उक्तायली. रायडर्स शाहरुख हाणें सांगलें, स्विगी कंपनीन रायडर्सांचो वापर करून घेतलो आनी कंपनीन फायदो मेळयलो. आतां रायडर्सांक मेळपी इन्सेंटीव्ह उणो केला. रायडर्स सकाळीं स वरां पसून रातचे उसरां मेरेन काम करतात आनी कुटुंबाचें पोट चलयतात. आतां कंपनी पांच किलोमीटर मेरेन फकत २० रुपया दितली, अशें सांगलां आनी तसो बदलूय जाला. ह्यान पयलीं जितल्यो ऑर्डरी पावयताले तितले पयशे दिताले. दिसभर १२ ऑर्डरी पुराय केल्यार ५६० रुपया, जाल्यार १७ ऑर्डरी पुराय केल्यार ९६० रुपया इन्सेंटिव्ह दिताले. आतां वरीश्ठ अधिकार्यांक हे विशीं विचारल्यार तांणी आयडी बंद करतले आनी कामावेल्यान काडपाची शिटकावणी दिल्या. सगळे रायडर्स पोटा खातीर काम करतात. तांचे हक्काचे पयशे काडून घेवन लुकसाण करचें न्हय. पांच वर्सां सावन हो वेवसाय सगळ्या हंगामांनी केला. दिसभरचो वैयक्तीक खर्च, पेट्रोल, गाडयेचो सांबाळ असो सगळो खर्च रायडर्स करतात. ताका लागून इन्सेंटिव्हांत जाल्लो बदल म्हारग थारतलो, अशें तांणी सांगलें.
स्विगीच्या वरिश्ठ अधिकार्यांनी हे विशीं लक्ष घालून आदलो इन्सेंटिव्ह परत दिवचो. ना जाल्यार राज्य सरकारान ह्या प्रस्नाचेर लक्ष घालून कामगारांची समस्या सोडोवची. ना जाल्यार कंपनीक राज्यांतल्यान भायर मारचें. ना जाल्यार सध्याचे रायडर्स काडल्यार नव्या रायडर्सां वांगडांय अशेंच जातलें, अशें तांणी सांगलें. जो मेरेन आदलो इन्सेंटिव्ह दर मेळना, तो मेरेन कामाचेर वच्चे नात असो निर्णय घेतिल्ल्याचें स्विगी रायडर्सांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
