भांगरभूंय | प्रतिनिधी
पर्वरे रेहबर खान खून प्रकरण
म्हापशें: सावळें, पिळर्ण वाठारांत ऑडीट भावना कुशीक रेहबर खुर्शीद अली खान (22, मूळ उत्तर प्रदेश) हाच्या खून प्रकरणांतलो दुबावीत आरोपी बिदेश रादेश हसूटीकर (24, रा. डांगी कॉलनी, म्हापशें) हाची पणजेंतल्या अतिरिक्त सत्र न्यायालयान सशर्त जामिनार सुटका केली.
हाचे पयलीं ह्या प्रकरणांतलो दुबावीत आरोपी संदेश श्याम नायक (रा. फट्टोवाडो नेरूल आनी मूळ गवळीवाडो काकोडें) आनी निलेश आत्माराम तुपकार (सर्वेवाडो, गिरी) हांकां जामीन मेळिल्लो.
न्यायाधीश बॉस्को, जीएफ रॉबर्टस हांणी दुबावीत बिदेश हाका 25 हजारांची हमी रक्कम आनी तितलेच रकमेच्या हमिदाराचे हमी प्रमाण जामीन मंजूर केला. न्यायालयाची परवानगी घेनासतना देशा भायर वचप ना, दरेक सुनावणे वेळार हाजेरी लावप, साक्षी पुराव्यांत छेडछाड, साक्षिदारांक धमकावपाचो यत्न करप ना, मोबायल क्रमांक आनी राबित्याचो नामो न्यायालय आनी पुलीस स्टेशनार सादर करप, जामिनार आसतना समान वा हेर कसलोय गुन्यांव करप ना अश्यो अटी न्यायालयान लागू केल्यात.
न्यायालयांत दुबाविता वतीन अॅड. विनायक पोरोब आनी अॅड. हर्षा कारेकार हांणी युक्तिवाद केलो. जाल्यार सरकारी पक्षा वतीन सरकारी अभियोक्ता कोलेमॉन रॉड्रिगीश हांणी युक्तिवाद केलो.
मजगतीं, हो खुनाचो प्रकार 16 एप्रील 2024 दिसा उत्तर रातीं घडिल्लो. सावळें पिळर्ण, पर्वरे ऑडीट भवना कुशीक मयत रेहबराची कूड पुलिसांक गस्ती वेळार सांपडिल्ली. मयताचो खून मान मोडिल्ल्यान तशेंच फाटीच्या कण्याक खर दुखापत जावन आनी रक्तस्रावाक लागून जाल्ल्याचें मरणा उपरांतचे तपासणे उपरांत सिद्ध जाल्लें.
उपरांत पुलिसांनी दुबावीत विकास यादव (रा. कोदांळी), खतेश तुकाराम कांदोळकार, सुमन हेमंत बरीक, सचीन चंद्रीका सहानी, तनय सुब्राय कांदोळकार, सचीन नागेंद्र सिंग (सगले रा. कांदोळी), आनंद सहदेव चिकलगेकर (मयडें, मूळ वाळपय), संतोष उमेश गांवस (म्हापशें), संदेश नायक (नेरूल, मूळ काकोडें), निलेश आत्माराम तूपकार (गिरी), आनी बिदेश हसूटीकर (डांगी कॉलनी म्हापशें) ह्या इकरा जाणांक अटक केल्ली. दुबावितां आड भा.दं.सं.च्या 143, 147, 342, 365, 392, 201, 302 आनी 149 कलमा खाला गुन्यांव नोंद करून न्यायालयांत आरोपपत्र दाखल केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
