भांगरभूंय | प्रतिनिधी
युरी आलेमांवः राहुलाक जिवेशी मारपाची धमकी दिवप्यां आड निदर्शनां
भांगरभूंय | प्रतिनिधी
पणजी : लोकसभेंतले विरोधी पक्ष फुडारी राहुल गांधी हांकां जिवेशी मारपाची आनी शारिरीक लुकसाण करपाची धमकी दिवपी भाजपा आमदार आनी मंत्र्यांचो आपूण निशेध करतां, अशें विरोधी पक्ष फुडारी युरी आलेमांव हांणी म्हणलें. प्रदेश काँग्रेसीन विरोधकांचो निशेध करतना पणजेंत निदर्शनां केलीं, बावले करून लासले.
‘भारत जोडो यात्रे’च्या माध्यमांतल्यान देशांतल्या लोकांक एकठांय हाडपाक आमचो फुडारी राहुल गांधी हांचो म्हत्वाचो वांटो आसा, ताका लागून तांकां आतंकवादी म्हणप समा न्हय. विरोधी पक्ष फुडारी राहुल गांधी हांचे आड फट उलोवप आनी फटीचे आरोप करप हो तांचो आवाज चेपपाचो यत्न आसा, अशेंय युरी हांणी म्हणलें.
राहुल गांधी हांची आजी हुतात्मा जाली, तांचो बापूय हुतात्मा जालो आनी तांच्या आज्यान देशाच्या स्वातंत्र्या खातीर बलिदान दिलें, हें देशाचे जनतेक खबर आसा. राहुल गांधी समाजांतल्या वंचीत घटकांचे प्रस्न सेगीत मांडटात आनी ह्या सरकारान देशाची संपत्ती आपल्या भांडवलदार इश्टांक कशी विकल्या, हे विशीं ते सेगीत उलयतात. हे खातीर भाजपा आनी ताचे इश्ट पक्ष अस्वस्थ जाल्यात, अशें युरी हांणी म्हणलें.
आमचो फुडारी राहुल गांधी हांकां धमकी दिवप्यांचो आपूण निशेध करतां. तरविंदर सिंग मारवाह, मंत्री रवनीत बिट्टू, मंत्री रघुराज सिंग, आमदार संजय गायकवाड हांणी दिल्ल्या धमक्यांचो आपूण निशेध करतां, अशें युरी हांणी म्हणलें. राहुल गांधी हांकां धमकी दिवपी ह्या भाजपा फुडाऱ्यां आड पुलीस कागाळ दाखल करतले, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
