भांगरभूंय | प्रतिनिधी
पणजी: विद्या प्रबोधिनी म्हाविद्यालयांत 14 सप्टेंबर दिसा हिंदी दीस मनयलो. कार्यावळीक मुखेल सोयरे म्हूण पीईएस म्हाविद्यालय फर्मागुडीचे हिंदी विभाग अध्यक्ष डॉ. संदीप लोटलीकार हाजीर आशिल्ले.
तांणी विद्यार्थ्यांक हिंदी दिसाचें म्हत्व पटोवन दिलें आनी भाशा ही प्रवाहमयी आसा. तिचें स्वरूप वेळे प्रमाण बदलत वतलें. तिका कट्टरवाद्यांनी बंधना घाल्यार ती नानपयत जातली अशें लोटलीकार हांणी म्हणलें.
कार्यावळ हिंदी विभागा वरवीं आयोजीत केल्ली. कार्यावळीची सुरवात विद्यार्थी खुशी ठाकूर हांच्या गणेश वंदनान जाली. ह्या वेळार माचयेर म्हाविद्यालयाचे प्राचार्य डॉ. भूषण भावे, उपप्राचार्य डॉ. उज्ज्वला हणजूणकार, संयोजक आशा नायक हाजीर आशिल्ल्यो.
हाजीर आशिल्ल्यांक प्राचार्य डॉ. भूषण भावे हांणी येवकार दिलो. जाल्यार प्रा. आशा नायक हांणी कार्यावळीचो हेत स्पश्ट केलो. तशेंच प्रा. देविका सांबारी हांणी मुखेल सोयर्यांची वळख करून दिली.
कार्यावळींत विद्यार्थ्यांच्या सृजनशिलतायेक वाव मेळचो ह्या हेतान कविता वाचन आनी आपउलोवप अशा दोन सर्तींचें आयोजन केल्लें. हे सर्तींक विद्यार्थ्यांनी बरो प्रतिसाद दिलो. आपउलोवप सर्तींत तिसरें वर्स बीएबीएडची सिद्धी शिरोडकार हिका पयलें इनाम जाल्यार दुसरें वर्स बीएबीएडची शर्वाणी साळगांवकार हिका दुसरें इनाम फावो जालें.
कविता वाचनांत पयलें सिद्रा फारुखी, दुसरें टिशा चोपडेंकार, तिसरें त्रिशा गावडे हांकां इनामां फावो जालीं. जाल्यार उमेद वाडोवपी सिद्धी शिरोडकार हिका इनाम भेटयलें.
विद्यार्थी रुकसाना कोलकार हिणें कार्यावळीचीं सुत्रां सांबाळ्ळी आनी प्रा. त्रिवेणी काणकोणकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
