भांगरभूंय | प्रतिनिधी
म्हापशें पालिकेचो आदेशः पंदरा दिसांची मुजत
भांगरभूंय । प्रतिनिधी
म्हापशें: एकतानगर, हावसींग बोर्डांत परवानगी घेनासतना जमीन माफिया दुबावीत सिद्धीकी उर्फ सुलेमान खानान बांदिल्लें बेकायदेशीर बांदकाम मातयो भरवण करपाचो आदेश म्हापशें नगरपालिकेन जारी केला. फुडल्या 15 दिसां भितर हें बांदकाम जर ताणें स्वता मोडलें ना जाल्यार पालिका तें मोडटलें आनी संबंदिताक ताचो खर्च फारीक करपाचो पडटलो, अशी शिटकावणी म्हापशें नगरपालिकेन दिल्या.
जानेवारी 2022 त म्हापशें पालिकेन एकतानगर हावसींग बोर्डांत म्हापशें शार चलता नं. 2 पीटीशीट नं. 67 चे सुवातेची पळोवणी केल्ली. तेन्ना ते सुवातेर खूबशीं बांदकामां उबारिल्ल्याचें, तशेंच मालमत्ते भोंवतणी दुरीग बांदिल्ल्याचें दिसलें. ते प्रमाण पालिकेन 12 जानेवारी 2022 ह्या दिसा संबंदितांक गोंय नगरपालिका कायदो 1968 च्या कलम 184 (8) प्रमाण कारणां दाखयात नोटीस जारी केल्ली.
ते प्रमाण ह्या प्रकरणांत पालिका अधिकार्यां कडल्यान सुनावणी घेतली. जातूंत सिध्दीकी खान हांकां तांची बाजू मांडपाची संद दिली. मात मालमत्ता आनी संरचनेची कायदेशीरताय सिध्द करपा खातीर तांचे कडेन कसलींच कागदपत्रां नाशिल्लीं. तशेंच सुनावणे वेळार खान हाजीर रावूंक नाशिल्ल्यान कार्यवाय फुडें व्हेली आनी ताचे आड पालिका मुख्याधिकार्यांनी एक आदेश जारी केलो. मजगतीं, एकतानगरांत सुमार 20 हजार 819 चौखस मिटर सुवातेचेर उपनिबंधकांचो बनावट रब्बर स्टॅम्पचो वापर करून आनी बनावट कागदपत्रां कायदेशीर आशिल्ल्याचें दाखोवन ती जमीन आपल्या नांवाचेर केल्ल्या प्रकरणांत सिद्धीकी उर्फ सुलेमान खान आनी हेरां आड म्हापशें पुलिसांनी सप्टेंबर 2020 त भारतीय दंड संहितेच्या 419, 465, 466, 467, 468, 471, 472 आनी 420 कलमा खाला गुन्यांव दाखल केल्लो. हे विशीं तेन्नाचे उपनिबंधक अर्जून शेटये हांणी पुलिशेंत कागाळ केल्ली. हे जमिनीचे प्लॉट करून ते विकपाक काडिल्ल्यान हो सगळो प्रकार उक्ताडार आयलो.
दुबावीत सिद्धीकी उर्फ सुलेमान खान हाचेर जमीन घोटाळ्याचे जायते गुन्यांव नोंद आसात. तशेंच फाटल्या जुलय 2014 त विखारी इंजेक्शन दिवन आनी गळो आवळून कुंमारवाडो हणजूणेंची लुईझा लिगोरीओ फर्नांडीस (70) हिचो खून तशेंच तिची भावजय तेरशीला फर्नांडीस (55) हिचेर जीव घेवपी हल्लो, जाल्यार सप्टेंबर 2016 त म्हापशेंचो वकील ज्ञानेश्वर कळंगूटकार हांचेर जीव घेवपी हल्लो दुबावितान केल्लो. लुईझा फर्नांडीस हिच्या खून प्रकरणांत सप्टेंबर 2018 त सिद्धीकी हाका अटक जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
