भांगरभूंय | प्रतिनिधी
डॉ. चंद्रकांत शेट्येः गृहआधाराच्या मंजुरी पत्रांचें वितरण
भांगरभूंय । प्रतिनिधी
दिवचलः गोंय आनी केंद्र सरकाराच्या विवीध येवजणे वरवीं गोंयांतल्या दरेका घरांत समृद्धी येवची, बायलांचें सक्षमीकरण तशेंच स्वयंपूर्म आनी आत्मनिर्भरता येवची हे खातीर सरकार वेगवेगळ्यो येवजण्यो आंखता. उद्देग वेवसाय, लघू उद्देगाच्या माध्यमांतल्यान बायलांक अदीक स्वयंपूर्ण करचे खातीर मुख्यमंत्री डॉ. प्रमोद सावंत हांच्या फुडारपणा खालचें आमचें सरकार वावुरता. उदरगतीचे प्रक्रियेंत बायलांनी आपलें योगदान दिवचें, अशें दिवचलचे आमदार डॉ. चंद्रकांत शेट्ये हांणी सांगलें.
दिवचल मतदारसंघांतल्या 168 बायलांक गृहआधार येवजणेंच्या मंजुरी पत्रांचें वितरण आमदार डॉ. शेट्ये हांचे हस्तुकीं जालें. ह्या सुवाळ्यांत ते उलयताले. ह्या वेळार मतदारसंघांतल्या विवीध पंचायतींचे सरपंच, पंच वांगडी, नगरसेवक तशेंच कार्यकर्ते हाजीर आशिल्ले.
गोंय सरकारान गृहआधाराच्या माध्यमांतल्यान दरेके बायलेक आदार दिला. तशेंच बायलो स्वयंपूर्ण जावच्यो हे खातीर लघुउद्देग आनी हेर उद्देगां खातीर उण्या कळंतरांत रीण उपलब्ध करून दिलां. महिला आनी बचत गट महिला मंडळ हांचे वरवीं बायलांक संघटीत करचे खातीर तशेंच तांकां वेगवेगळ्या उपक्रमांची म्हायती दिवन लघुउद्देग आनी घराघरांत हाताक काम दिवपाचो सरकारान निश्चेव केला. बायलांनी ह्या वावरांत स्वता जावन लक्ष घालून आत्मनिर्भर जावचे खातीर वावर करचो, असोय उलो डॉ. शेट्ये हांणी मारलो.
मजगतीं, मुख्यमंत्री सहाय्य निधींतल्यान सुमार 68 जाणांक डॉ. शेट्ये हांचे हस्तुकीं आयतारा चॅक भेटयले. मुख्यमंत्री डॉ. सावंत हांची सेगीत मजत मेळिल्ल्यान उदरगत तशेंच समाजीक येवजण्यांचो लाव घेवप शक्य जाता, अशें डॉ. शेट्ये हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
