भांगरभूंय | प्रतिनिधी
कामगारांची तपासणी करपाची जापसालदारी आता बोटीच्या धनयांची
पणजी : कुटबण तशेंच मोबोर जेटीचेर भायल्यान आयिल्ल्या कामगारांक लागून काॅलेराची लागण जाली. तपासणी खातीर दोतोराची सुविधाय आसून लेगीत कामगारांनी निश्काळजीपणां केलीं. आतां ह्यान फुडें कामगारांच्या भलायकेची तपासणी करपाची जापसालदारकी बोटीच्या धनयांची आसतली, अशें नुस्तेंमारी नीळकंठ हळर्णकार हांणी स्पश्ट केलां.
चवथी पयलीं काॅलेरा आनी हेर म्हामारीक लागून कुटबण जेटीचेर ४ जाल्यार मोबोर जेटीचेर एका कामगाराक मरण आयिल्लें. हे विशीं उलयतना नुस्तेंमारी मंत्र्यांनी हें स्पश्टीकरण केलें. नुस्तेंमारीचो हंगाम सुरू जातकीर कारवार तशेंच हेर वाठारांतल्यान कामगार आयले. हाचे मदल्या कांय कामगारांक काॅलेराची लागण जाल्ली. कुटबण जेटीचेर तपासणी खातीर दोतोरांची वेवस्था आसा. तरी ह्या कामगारांनी वैजकी तपासणी करूंक ना. ह्या कामगारां वरवीं काॅलेरा दुयेंस पातळ्ळें. कुटबण जेटी कुशीक भलायकी केंद्र आसा. नितळसाण नासली जाल्यार काॅलेरा दुयेंसाची लागण जाता, अशें हळर्णकार हांणी सांगलें.
हंगाम सुरू जातकीर सगळ्या कामगारांची भलायकेची तपासणी जावपाक जाय. आतां ह्यान फुडें भलायकेची तपासणी करपाची जापसालदारकी बोटीच्या धनयांची आसतली, अशें मंत्री हळर्णकार हांणी सांगलें.
जेटी तशेंच कांय बोटींचेर शौचालयाची वेवस्था आसा. कांय कामगार शौचालयांचो वापर करिनात. नितळसाण राखपा सयत भलायकेची तपासणी करपाची जापसालदारकी कामगार तशेंच बोटींच्या धनयांचीय आसा, अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
