भांगरभूंय | प्रतिनिधी
पणजी : दक्षीण गोंय जिल्लो हॉस्पिटलांत गरजेच्यो सुविधा नाशिल्ल्यान थंयच्यान दुयेतींक जीएमसींत धाडटात. ह्या हॉस्पिटलांत सुविधा उबारपा खातीर सरकाराक अपेस आयलां. हाचो फटको दक्षीण गोंयच्या लोकांक बसता, अशें कॉंग्रेसीचे प्रदेशाध्यक्ष अमित पाटकार हांणी स्पश्ट केलें. पणजेच्या पक्ष कार्यालयांत मंगळारा घेतिल्ले पत्रकार परिशदेंत ते उलयताले. उत्तर गोंय अध्यक्ष विरेंद्र शिरोडकार आनी दक्षीण गोंय अध्यक्ष सावियो डिसिल्वा ह्या वेळार हजर आशिल्ले.
दक्षीण गोंय, उत्तर गोंय जिल्लो हॉस्पिटलां तशेंच फोंडेंच्या उपजिल्लो हॉस्पिटलांत विवीध तरेच्या दुयेतींचेर उपचार करपाच्यो सुविधा नात. हें खबर आसून लेगीत गांवगिर्या वाठारांतल्या दुयेतींक थंय धाडटात. तशेंच असल्या दुयेतींक सरळ जीएमसींत धाडल्यार तांचेर रोखडोच उपचार जावन जीव वाटावपाक मजत जातली, अशेंय पाटकार हांणी सांगलें.
तांणी मुखार म्हणलें, इंडिया आघाडेंतले गोंयचे घटक पक्ष एक नाशिल्ल्याचें दिसून येता. राष्ट्रीय पक्ष आशिल्ल्या कॉंग्रेसीचो हांव प्रदेशाध्यक्ष. येवपी विधानसभा वेंचणुके मेरेन राज्यांतल्या चाळीसूय मतदारसंघांत कॉंग्रेसीक घटमूट करपाचें ध्येय मुखार दवरून हांव काम करतां अशें पाटकार हांणी सांगलें. लोकसभा आनी विधानसभा वेंचणुकेचीं गणितां वेगळीं आसतात.
राज्यांत निकृष्ट दर्जाचे रस्ते बांदिल्ल्या कंत्राटदार, अभियंत्यांचेर सरकारान बेगीनूच कारवाय करून तांचे कडल्यान संबंदीत रस्ते परत करून घेवपाची गरज आसा. इबाडिल्ल्या रस्त्यां विशीं कॉंग्रेसीन आंदोलन सुरू केले उपरांत सरकाराक जाग आयिल्ल्याचेंय तांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
