भांगरभूंय | प्रतिनिधी
म्हापशें नगरपालिकेन दिली पंदरा दिसांची मुजत
म्हापशें ः एकतानगर, हावसिंग बोर्डांत पयलींच परवानगी घेनासतना जमीन माफिया दुबावीत सिद्धीकी उर्फ सुलेमान खानान बांदिल्लें बेकायदेशीर बांदकाम जमनी भरवण करपाचो आदेश म्हापशें नगरपालिकेन जारी केला. येवपी १५ दिसांनी हें बांदकाम जर ते स्वता मोडपाक अपेशी जाल्यार पालिका तें मोडटलें आनी संबंदीतांक खर्च फारीक करपाचो पडटलो अशी शिटकावणी म्हापशें नगरपालिकेन दिल्या.
फाटल्या जानेवारी २०२२ त म्हापशें पालिकेन एकतानगर हाऊसिंग बोर्ड हांगच्या म्हापशें शार चलता क्रमांक २ पीटीशीट क्रमांक ६७ चे सुवातेची पळोवणी केल्ली. तेन्ना ह्या जाग्यार खुबशीं बांदकामां उबारल्यांत. तशेंच मालमत्ते भोंवतणी दुरीग घातिल्ल्याचें दिसलें. ते प्रमाण पालिकेन १२ जानेवारी २०२२ दिसा संबंधीतांक गोंय नगरपालिका कायदो १९६८ च्या कलम १८४ (८) प्रमाण कारणां दाखयात नोटीस जारी केल्ली.
ते प्रमाण ह्या प्रकरणांत पालिका अधिकार्यां कडल्यान सुनावणी घेतली. जातूंत सिध्दीकी खान हांकां तांची बाजू मांडपाची संद दिली. मात मालमत्ता आनी संरचनेची कायदेशीरताय सिध्द करपा खातीर तांचे कडेन कसलींच कागदपत्रां नाशिल्लीं. तशेंच सुनावणे वेळार खान हे हजर रावंक नाशिल्ल्यान कार्यवाय फुडें व्हेली आनी ताचे आड पालिका मुख्याधिकार्यांनी एक आदेश दिला.
मजगतीं, एकतानगरांत सुमार २० हजार ८१९ चौरस मिटर सुवातेचेर उपनिबंधकांचो बनावट रब्बर स्टॅम्पचो वापर करून आनी बनावट कागदपत्रां कायदेशीर आशिल्ल्याचें दाखोवन ती जमीन आपल्या नांवाचेर केल्ल्या प्रकरणांत सिद्धीकी उर्फ सुलेमान खान आनी हेरां आड म्हापशें पुलिसांनी सप्टेंबर २०२० त भारतीय दंड संहितेच्या ४१९, ४६५, ४६६, ४६७, ४६८, ४७१, ४७२ व ४२० कलमा खाला गुन्यांव दाखल केल्लो. हे विशीं तेन्नाचे उपनिबंधक अर्जुन शेटये हांणी पुलिशेंत कागाळ केल्ली. हे जमिनीचें भुखंड करून ती विकपाक काडिल्ल्यान हो सगळो प्रकार उक्ताडार आयलो.
दुबावीत सिद्धीकी उर्फ सुलेमान खान हाचेर जमीन घोटाळ्याचे जायते गुन्यांव नोंद आसात. तशेंच फाटल्या जुलय २०१४ त विखारी इंजेक्शन दिवन आनी गळो पिळून कुंभारवाडो हणजूण हांगची लुईझा लिगोरीओ फर्नांडीस (७०) हांचो खून तशेंच तिची भावजय तेरशीला फर्नांडीस (५५) हिचे जीव घेवपी हल्लो. जाल्यार सप्टेंबर २०१६ त म्हापशेंचो एक वकील ज्ञानेश्वर कळंगूटकार हांचे जीव घेवपी हल्लो दुबावितान केल्लो. लुईझा फर्नांडीस हिच्या खून प्रकरणांत सप्टेंबर २०१८ त सिद्धीकी हाका अटक जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
