भांगरभूंय | प्रतिनिधी
कोरगांव पेडण्यां भुरग्याचें अपहरण प्रकरण
पणजी: कोरगांव पेडण्यां देड वर्साच्या भुरग्याचे अपहरण प्रकरणांतलो मुखेल सुत्रधार तशेंच निलंबीत पुलीस निकेश च्यारी हाका बाल न्यायालयान 25 हजार रुपया आनी हेर अटीचेर सशर्त जामीन मंजूर केला. हे विशींचो आदेश बाल न्यायालयाचे न्यायाधीश सई प्रभुदेसाय हांणी दिला.
ह्या प्रकरणांत चंद्रकांत वेंगुर्लेकार हांणी पेडणें पुलीस स्टेशनार कागाळ दाखल केली. ते प्रमाण शुक्रारा 30 वेर रातीं दुचाकी वेल्यान आयिल्ल्या दोगांनी कागाळदाराच्या देड वर्सा पिरायेच्या नातवाचें अपहरण करपाचो यत्न केल्लो. त्या वेळार कागाळदारान बोवाळ घाल्ल्यान शेजारच्या लोकांचे दक्षतायेक लागून कागाळदाराच्या ल्हान नातवाचें अपहरण करपाचो यत्न फळादीक जालो ना.
त्या वेळार दुचाकी वेल्यान आयिल्लो संजय बाबुराव नार्वेंकार (47, रा. शिरोडा, सिंधुदुर्ग) ह्या जिवरक्षकाक लोकांनी धरून पुलिसांचे सुवादीन केलो. ह्या प्रकरणांतलो दुसरो दुबावीत तशेंच मुखेल सुत्रधार तशेंच निलंबीत पुलीस निकेश च्यारी हाणें पळ काडिल्लो. उपरांत दुसर्या दिसा ताका पुलिसांनी अटक केली.
ह्या प्रकरणांत पुलिसांनी दोगां आड भारतीय न्याय संहितेच्या 237 (3) आनी 3(5) आनी गोंय बाल कायदो कलम 8 खाला अपहरणाचो गुन्यांव नोंद केलो.
ह्या गुन्यांवांत वापरिल्ली एमएच 07 एम 4271 ही मोटारसायकल आनी एमएच 43 व्ही 9842 ही मोटारूय जप्त केली.
मजगतीं, ह्या प्रकरणांत दुबावीत च्यारी हाणें बाल न्यायालयांत जामीन अर्ज दाखल केलो, तेन्ना न्यायालयान दुबावीत निकेश च्यारी हाका 25 हजार रुपया, पुलीस तपासांत सहकार्य करप, कागाळदार वा साक्षिदाराचेर चेपण हाडप ना आनी हेर अटीचेर सशर्त जामीन मंजूर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
