भांगरभूंय | प्रतिनिधी
उदका स्रोत खात्यान बांय पुरयिल्ल्यान फुडारांतलो धोको टळ्ळो
वाळपय: केरी हांगासरल्या दोन माड जंक्शनार आशिल्ली सुमार 45 वर्सांची पोरणी बांय काल अचकीत कोसळ्ळी. ह्या बांयच्या शेजरा आशिल्ल्या दुकानाचें कांय प्रमाणांत लुकसाण जालें. पूण कसलीच जिवीतहानी जाली ना. निमाणें पर्येंच्यो आमदार डॉ. देविया राणे हांकां हे विशींची म्हायती मेळटकच संबंदीत खात्याचे यंत्रणेक निर्देश दिले उपरांत सांजवेळा उसरां मेरेन बांय पुरयली.
ही बांय सुमार 45 वर्सां पोरणी आसून एकाकाळार हे बांयचे लोक पियेवपा खातीर उदक वापरताले अशी म्हायती मेळ्ळी.
मजगतीं, हे विशीं मेळिल्ले म्हाती प्रमाण ही बांय 45 वर्सां पयलीं खणिल्ली. त्या वेळार वाठारांत पियेवपाच्या उदकाची सुविधा निर्माण करपा खातीर ह्या बांयची वेवस्था केल्ली. पूण आतां हे बांयचें उदक कोणूच वापरनाशिल्ले. ही बांय सामकी पोरणी आशिल्ली. केरी हांगासरल्या दोन माड जंक्शन ह्या बाजार वाठाराच्या शेजराक ही बांय आशिल्ली.
थळाव्या नागरिकां कडल्यान मेळिल्ले म्हायती प्रमाण फांतोडेर सुमार पांच वरांच्या सुमाराक ही बांय अचकीत कोसळ्ळी. ह्या बांयच्या शेजरा आशिल्ल्या दुकानाचो कांय भाग हे बांयंत कोसळ्ळो. हाका लागून दुकानदाराक कांय प्रमाणांत लुकसाण सोंसचें पडलें. पूण कसलीच जिवीतहानी जाली ना अशी म्हायती थळाव्यांनी दिली.
घडये ही घडणूक दिसा उजवाडा घडिल्ली जाल्यार हांगा व्हड अनर्थ घडपाची शक्यताय आशिल्ली. पूण ही घडणूक फांतोडेर घडिल्ल्यान कसलेच तरेची वायट घडणूक घडली ना अशें थळाव्यांनी सांगलें.
ही बांय कोसळ्ळे उपरांत वाठाराचे पंच वांगडी सय्यद उस्मान हांणी थळाव्यो आमदार डॉ. राणे हांचे कडेन संपर्क सादून तांकां हे विशींची म्हायती दिली. तांणी रोखडीच हाची गंभीर दखल घेवन उदका स्रोत खात्याच्या अधिकारी वर्गा कडेन संपर्क सादून उपाय येवजण करपाची मागणी केली.
हाची दखल घेवन उदका स्रोत खात्याच्या अधिकारी वर्गान घडणूक थळार धांव घेवन कोसळिल्ली बांय पुरयली. तशेंच बांयचे भोंवतणी राखणे वंय घाल्ल्यान आतां कसलोच धोको नाशिल्ल्याचें थळाव्यांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
