भांगरभूंय | प्रतिनिधी
एमबीबीएस, बीडीएसच्यो सगळ्यो सुवातो भरल्यो
पणजी, प्रतिनिधी : खासा प्रवेश फेरये उपरांतूय पदविका अभियांत्रिकीच्यो (पॉलीटेक्निक) १८० जाल्यार पदवी अभियांत्रिकेच्यो ४८५ (बीई) सुवातो रित्यो उरल्यात. एमबीबीएसच्यो सगळ्यो २०० जाल्यार बीडीएसच्यो (दंत म्हाविद्यालय) सगळ्यो ४१ सुवातो भरल्यात. आयुर्वेदीक, बीएससी नर्सिंग प्रवेशा खातीरच्यो फेरयो सुरू आसात. तांत्रीक शिक्षण संचालनालयाचे उपसंचालक प्रदीप कुस्नूर हांणी ही म्हायती दिली.
फर्मागुडीच्या सरकारी अभियांत्रिकी म्हाविद्यालयांतले पद्वी अभियांत्रिकाच्यो सगळ्यो सुवातो भरल्यात. रायेश्वर इन्स्टिट्यूट ऑफ टेक्नोलॉजी (शिरोडा) तशेंच आग्नेल इन्स्टिट्यूट ऑफ डिझायन (आसगाव) हांगाच्यो सुवातो रित्यो आसात. प्रवेशाचे निमणे फेरयेत पद्वी अभियांत्रिकीच्यो फकत १५ सुवातो भरल्या. हाका लागून ४८५ सुवातो आजूनय रित्यो आसात.
पदविका अभियांत्रिकाच्यो (पॉलीटेक्निक) २०० सुवातो रित्यो आशिल्ल्यो. निमणे फेरयेंत २० सुवातो भरल्यो. हाका लागून पद्विका अभ्यासक्रमाच्यो १८० सुवातो रित्यो आसात. गार्मेंट टॅक्नोलॉजी, फूड टॅक्नोलॉजी ह्या अभ्यासक्रमाक विद्यार्थ्यांचो सामको उणो प्रतिसाद मेळटा.
वैजकी (एमबीबीएस) आनी दंत (बीडीएस) अभ्यासक्रमाच्यो मात सगळ्यो सुवातो भरल्यात. एमबीबीएस खातीर पयलीं १८० सुवातो आशिल्ल्यो. राष्ट्रीय वैजकी आयोगान २०० सुवातो भरपाक मान्यताय दिले उपरांत प्रवेशाचे दुसरे फेरयेंत आनीक २० सुवातो भरल्यो. बीडीएस अभ्यासक्रमा खातीर पयल्या वर्साक ४१ विद्यार्थ्यांक प्रवेश दिला. बीडीएस अभ्यासक्रमाच्यो सगळ्यो सुवातो भरल्यात. नीट परीक्षेच्या गुणांचेर आयुर्वेदीक (बीएएमएस) तशेंच बीएससी नर्सींंग अभ्यासक्रमाक प्रवेश दिवपाची प्रक्रीया सध्या सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
