भांगरभूंय | प्रतिनिधी
एससी, एसटी खातीर राखीव प्रभाग ना, २० ऑक्टोबराक वेंचणूक
पणजी, प्रतिनिधी : हरवळें पंचायतीच्या ५ प्रभागां खातीर २० ऑक्टोबराक वेंचणूक जातली. अनुसूचित जाती (एससी), अनुसूचित जमाती (एसटी) तशेंच हेर मागासवर्गीयांचे प्रमाण उणें आशिल्ल्यान एससी, एसटी तशेंच ओबीसीं खातीर एकूय प्रभाग राखीव ना. बायलां खातीर चवथो आनी पांचवो प्रभाग राखीव आसा. हरवळें पंचायत मुख्यमंत्री डॉ. प्रमोद सावंत हांच्या सांखळे मतदारसंघांत आशिल्ल्यान हे पंचायत वेंचणुकेक म्हत्व आसा.
साश्ट म्हालांतल्या ओर्ली पंचायतीच्या प्रभाग ७ आनी केपें म्हालांतल्या मोरपिर्ला पंचायतीच्या प्रभाग ६ खातीर २० ऑक्टोबराक पोटवेंचणूक जातली. राज्य वेंचणूक आयुक्त दौलत हवालदार हांणी पत्रकार परिशदेंत वेंचणुकेची कार्यावळ जाहीर केली. ह्या वेळार आयोगाचे सचिव वेनांसियो फुर्तादो हाजीर आशिल्ले. हरवळें पंचायतीचो कार्यकाळ १८ ऑगस्ट २०२४ ह्या दिसा सोंपिल्ल्यान पंचायतीचेर प्रशासकाची नेमणूक जाल्या. हरवळेंच्या पांच प्रभागां मदीं २०९१ मतदार आसा. अनुसूचित जातीचे (एससी) मतदार ८३ जाल्यार अनुसूचित जमातीचे (एसटी) मतदार ३३ आसा. तशेंच हेर मागासवर्गी (ओबीसी) मतदारांचो आंकडो ३०६ आसा. एससी, एसटी आनी ओबीसींचे प्रमाण उणें आशिल्ल्यान तांचे खातीर एकूय प्रभाग राखीव दवरपाक मेळना, अशें हवालदार हांणी सांगलें.
वेंचणूक जाहीर जाल्ल्यान हरवळें पंचायत वाठारांत आचारसंहिता लागू जाल्या. १ ऑक्टोबर ते ९ ऑक्टोबर मेरेन सकाळीं १० ते दनपरां १ मेरेन उमेदवारी अर्ज भरपाची मुजत आसा. १० ऑक्टोबराक उमेदवारी अर्जांची छाननी जातली. ११ ऑक्टोबराक दनपरां २ मेरेन उमेदवारी अर्ज फांटी घेवपाची मुजत आसा. २० ऑक्टोबराक मतदान जाले उपरांंत २१ ऑक्टोबराक मतमेजणी जातली. मतदान मतपत्रिकेच्या आदारान जातलें. उमेदवाराक ४० हजार रूपया मेरेन खर्च करपाची मर्यादा आसतली. वेंचणूक आचारसंहितेच्या कार्यवाये खातीर निरीक्षकांची नियुक्ती केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
