भांगरभूंय | प्रतिनिधी
कळंगूट पुलिसांची कारवाय; पंजाबांत विद्यार्थ्यांचेर खुनी हल्लो प्रकरण
म्हापशें: गँगस्टर लॉरेन्स बिश्नोई हाचे टोळयेंतल्या स जाणांक कळंगूटे गोंय पुलिसांच्या पालवान मोहाली पंजाब पुलिसांनी अटक केली. दोगां म्हाविद्यालयीन तरणाट्यांचेर खुनी हल्लो करून दुबावीत आरोपींनी गोंयांत राबितो केल्लो. दुबावीत आरोपींचेर पंजाबांत वट्ट 18 गंभीर गुन्यांव नोंद आसात.
यश्वीर जगदीश चौधरी (21, रा. नोहका, राजस्थान), कपील सुरेंद्र खत्री (22, रा. मोहाली, आनी मूळ हरियाणा), हर्ष राजकुमार तावर (19, रा. मोहाली आनी मूळ हरियाणा), सौरव सतीश कुमार बैन्नीवाल (19 रा. हरियाणा), अनूजकुमार जयपाल चौधरी (19, रा. मोहाली आनी मूळ हरियाणा) आनी राहूल हिमराज डगर (21, रा. फिरीदाबाद हरियाणा) अशीं अटक केल्ल्या दुबावितांचीं नांवां आसात.
फाटल्या 12 सप्टेंबर दिसा पंजाबांतल्या मोहाली जिल्ह्यांतल्या सिटी खरार पुलीस स्टेशनाचे हद्दीतल्या एका कॉलेजीच्या प्राकारांत हो खुनी हल्ल्याचो प्रकार घडिल्लो. कागाळदार हरदीप मलीक आनी कुशल ह्या दोगां विद्यार्थ्यांचेर दुबावीत आरोपींनी धारेच्या शस्त्रान हल्लो केल्लो. दोगांय जखमींचेर सिटी खरार हांगासरल्या हॉस्पिटलांत उपचार सुरू आसात.
हो हल्लो केले उपरांत दुबावीत आरोपी गोंयांत आयले. आयतारा 15 वेर सवूय दुबावीत आरोपी गोंयांत कळंगूटे राबित्याक आशिल्ल्याची म्हायती सिटी खरार पुलिसांच्या हाताक लागली. उपरांत पंजाब पुलिसांनी कळंगूट पुलिसां कडेन संपर्क सादलो. दुबावीत आरोपी माड्डोवाडो कळंगूटे हॉटेल स्मॉल डॅडीत आशिल्ल्याची खात्री कळंगूट पुलिसांक जाली.
अटक केल्ले सवूय दुबावीत आरोपी भारतीय गँगस्टर लॉरेन्स बिश्नोई हाचे टोळये कडेन संलग्न आशिल्ल्याचें पंजाब पुलिसांचो दुबाव आसा. गँगस्टर बिश्नोई हो सद्या तिहार बंदखणींत आसून ताचे आड दोन डझन परस चड गुन्यांव नोंद आसात. जाल्यार वयल्या अटक केल्ल्या दुबावितांचेर खुनी हल्लो, खंडणी सयत वट्ट 18 गुन्यांव नोंद आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
