भांगरभूंय | प्रतिनिधी
ओबीसी महासभा ट्रस्टा वतीन विशेश कार्यावळीचें आयोजन
दिवचल: गोंय स्वयंपूर्ण करपा खातीर समाजीक संघटणांनी शेती, दुदाचो वेवसाय, नुस्त्याचो वेवसाय, फलोत्पादन आनी फूल उत्पादन वेवसायांत देंवचें. हलकें काम करता असो विचार करून गोंयकार वागत जाल्यार गोंय केन्नाच स्वयंपूर्ण जावचें ना. उरफाटें हेर राज्यांचेर निंबून रावपाच्या प्रमाणांत वाड जातली. ते खातीर अहंकार कुशीक दवरून आपल्या परंपरीक वेवसायाच्या वाडी खातीर मुखार येवचें अशें आवाहन मुख्यमंत्री डॉ. प्रमोद सावंत हांणी आमोण्यां केलें.
अखील भारतीय ओबीसी महासभा ट्रस्टा वतीन ह्या वर्सा पयलेच फावटी घाडीवाडो आमोण्यां पुजिल्ल्या भौशीक गणेशोत्सवांत ओबीसी समाजांत विवीध मळार बरी कामगिरी केल्ल्या मानेस्तांचो भोवमान सुवाळो आयोजीत केल्लो. ह्या सुवाळ्यांत मुख्यमंत्री डॉ. प्रमोद सावंत उलयताले.
ह्या वेळार माचयेर अखील भारतीय ओबीसी महासभा ट्रस्टाचे अध्यक्ष शशिकांत घाडी सचीव विठोबा घाडी भौशीक गणेशोत्सव समितीचे अध्यक्ष मनोज वायंगणकार, थळावे पंच वांगडी वासुदेव घाडी, पंकज नमशीकार बी हाजीर आशिल्ले.
सरकार खूबश्यो येवजण्यो लोकां मेरेन पावोवपा खातीर लोकप्रतिनिधीं बरोबरच समाजीक संस्थांनीय लोकां मदीं जागृताय आनी कार्य करचें. स्वयंपूर्ण गोंय हे संकल्पने बरोबरूच अंत्योदय तत्वाचेर काम करपाची आपली मोख आसा. ही मोख आपूण एकलो साध्य करूंक शकना. ते खातीर राज्यांतल्या विवीध भौशीक, समाजीक संस्थांच्या सहकार्याची गरज आसा. ते खातीर सगल्यांनी गोंयाक सगल्या मळार मुखार व्हरपाची जबाबदारी आपल्या खांद्यार घेवन लोकां मदीं जागृताय आनी प्रोत्साहन निर्माण करपाचें काम करचें अशेंय मुख्यमंत्र्यांनी मुखार उलयतना सांगलें.
ह्या वेळार मुख्यमंत्री डॉ. प्रमोद सावंत हांचे हस्तुकीं अॅड. विद्या गावडे सतरकार, विश्रांती नायक, अजीत पोरोब, सदाशीव गोवेकार, रॉयला फर्नांडीस, मनोज वायंगणकार, आत्माराम गांवकार, कालिदास घाटवळ, वासुदेव घाडी, उल्हास परब, दिक्षा कांदोळकार, कायतानो फर्नांडीस, सुनील फडते, विठोबा घाडी, बेबी घाडी, महेश शिलकार हांचो शाल आनी यादस्तीक भेटोवन भोवमान केलो. जाल्यार आदले सभापती सर्गेस्त अनंद शेट, आदले उपसभापती स. विष्णू सुर्या वाघ, ज्येश्ठ पत्रकार स. औदुंबर च्यारी, स. गोविंद हिरवे हांचोय मरणा उपरांत भोवमान केलो.
ह्या सुवाळ्यांत अखील भारतीय ओबीसी महासभा ट्रस्टा वतीन काडिल्ल्या यादस्तिकेचें प्रकाशन मुख्यमंत्री डॉ. प्रमोद सावंत हांचे हस्तुकीं केलें. येवकार अध्यक्ष शशिकांत घाडी हांणी दिलो. सुत्रसंचालन पंकज नमशीकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
