भांगरभूंय | प्रतिनिधी
कॅप्टन थिमाप्पा स्मृती चार दिसांचे मॅचींत गोंयान आपले अखेरचे लीग मॅचींत जैत जोडलें. काल अलूर-2 गोल्डन ओव्हलाचेर निमाण्या दिसा गोंय पंगडान केएससीए इलेव्हनाचो दुसरो डाव 121 धांवड्यांचेर गुठलायलो आनी 189 धांवड्यांनी व्हड जैत जोडलें. 310 धांवड्यांनी फाटीं उरल्या उपरांत 3 बाद 35 धांवड्यां वयल्यान केएससीए इलेव्हनान खेळपाक सुरवात केल्ली.
गोंयच्या फास्ट बॉलरांनी मॅच जिखून दिली. दुसऱ्या डावांत ऋत्विक नायकान 46 धांवड्यो दिवन 4, अर्जुन तेंडुलकरान 55 धांवड्यो दिवन 4 आनी हेरंब परबान 3 धांवड्यो दिवन 2 विकेटी घेतल्यो. केएससीए इलेव्हना खातीर फकत मुखेली आर स्मरण आनी मोहसीन खान हांणीच कितें तो गोंयच्या बॉलरांचो प्रतिकार केलो. स्मरणान 75 बॉलांनी 58 धांवड्यो केल्यो. ताणें णव चवके आनी एक सको मारलो.
गोंय पंगड लिगेंत तीन मॅची खेळ्ळो. मध्य प्रदेश आनी छत्तीसगड ह्या पंगडां आड ताका डावान हार घेवची पडिल्ली. गोंयचो पंगड आतां सराव मॅची खातीर 19 सप्टेंबराक चंदीगडाक वतलो.
थोडें भितर धांवतकटोः केएससीए इलेव्हन, (पयलो डाव) सगले बाद 103, गोंय (पयलो डाव) सगले बाद 413, केएससीए इलेव्हन, (दुसरो डाव) 30.4 ओव्हरींनी सगले बाद 121 धांवड्यो (स्मरण आर 58, चिन्मय एन ए 9, शरथ श्रीनिवास 3, आदित्य नायर 9, मोहसीन खान 20, रोहीतकुमार एस सी 2, नॅथन डिमेलो नाबाद 0, संतोख सिंग 9 धांवड्यो, दर्शन मिशाळ 2-14-0, किथ पिंटो 2-1-0, अर्जुन तेंडुलकर 10-55-4).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
