भांगरभूंय | प्रतिनिधी
आमदार राजेश फळदेसायः बरो म्हूर्त सोदून बसयतले बुन्यादी फातर
भांगरभूंय । प्रतिनिधी
पणजीः म्हाळ म्हयन्याक लागून गंवडाळे रेल्वे उड्डाण पुला खातीर बुन्यादी फातर बसोवपाचें काम फुडें धुकल्लां. म्हाळ म्हयन्यांत कसलेंच शुभ काम करिनात, हे खातीर ह्या म्हयन्यांत जावपा आशिल्ली बुन्यादी फातर बसोवपाची कार्यावळ फुडें धुकल्ल्या. 3 ऑक्टोबरा उपरांत शुभ म्हूर्त सोदून ताचो बुन्यादी फातर बसयतले. 6 म्हयन्यांत ताचें काम पुराय जातलें, अशे थळावे आमदार राजेश फळदेसाय हांणी सांगलें.
वाळपय, सांखळी, माशेल आनी सावयवेरेंच्यान पणजे येवपी लोक गंवडाळेच्या रस्त्याचो वापर करतात. पूण ह्या रस्त्याचेर रेल्वे क्रॉसींग आशिल्ल्यान, आडो (गेट) घालून येरादारी दोनूय वटांनी बंद करची पडटा. रेल्वेक वचपाक वाट दिवपा खातीर दोनूय वटांनी रस्तो बंद आशिल्ल्यान येरादारेची कोंयडी जाता आनी दोनूय वटांनी गाडयांच्यो रांको लागतात. कांय जाण रांक मोडून मदींच घुसतात आनी येरादारेची कोंयडी आनी गंभीर जाता. कितलीशींच वर्सां जाली, ह्या रस्त्यार यो-वच करतना लोकांक त्रास सोसचे पडटात. लोकांक ह्या त्रासांतल्यान थाकाय दिवपा खातीर कुमारजुंवेचे आमदार राजेश फळदेसाय हांणी रेल्वे क्रॉसिंगाचे सुवातेर उड्डाण पूल बांदपाचो प्रस्ताव सरकाराक धाडिल्लो आनी मुख्यमंत्री डॉ. प्रमोद सावंत हांणी ह्या प्रस्तावाक मंजुरी दिवन गोंय साधन सुविधा उदरगत महामंडळ (जीएसआयडीसी) वरवीं थंय उड्डाण पूल बांदपाचें थारायल्ले. पूण केन्ना हाचें काम चालीक लागतले हाची वाट पळयत लोक राविल्ले.
हे विशीं म्हायती दितना आमदार फळदेसाय हांणी सांगलें, हे सुवातेर बॉक्स पूल बांदपा खातीर 18 सप्टेंबराक बुन्यादी फातर बसोवपाचे थारयल्लें. पूण आयच्यान म्हाळ म्हयनो सुरू जाता म्हूण जीएसआयडीसी कसलेंच काम करिना. आपणे मुख्यमंत्री आनी हेर अधिकाऱ्यां वांगडा चर्चा केली. त्या वेळार भटजींक फोन करून तांचो सल्लो घेतलो तेन्ना तांणी सांगलें, म्हाळ म्हयन्यांत बुन्यादी फातर बसोवपाचें काम हातांत घेव नाकात, अशें फळदेसाय हांणी सांगलें. ह्या पुला खातीर बुन्यादी फातर बसोवपाचें काम आमी चड करून 3 ते 4 ओक्टोबरा उपरांत हातांत घेतले. हे कार्यावळी खातीर आमी अजून तारीख थारांवक ना, ताचेर विचार चल्ला. 50 कोटी रुपया खर्च करून 350 मिटर लांबायेचो आनी 12 मिटर रुंदायेचो रेल्वे बॉक्स ब्रीज आमी बांदतले. हें काम 6 म्हयन्यां भितर पुराय जातलें, अशी म्हायती फळदेसाय हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.