भांगरभूंय | प्रतिनिधी
आशांक देसाईः ‘एनईपी’ फायद्याची थारपाचो विस्वास
भांगरभूंय । प्रतिनिधी
पणजीः म्हायती- तंत्रज्ञान (आयटी) मळार गोंयची उदरगत करचे खातीर गोंयांतल्या तरणाट्यांची मानसिकता बदलपाची गरज आसा. मानसिकता बदलपाची सुरवात शाळांतल्यान जाता. हे खातीर शिक्षण वेवस्तेंत बदल जावप गरजेचो आस. नव्या शिक्षणीक धोरणाक लागून (एनईपी) तें शक्य जातलें, अशें मत संवसारीक नामनेचे आयटी तज्ञ आशांत देसाई हांणी सोमारा उक्तायलें.
श्रमीक पत्रकार संघ (गूज) आनी गोवा मराठी पत्रकार संघाच्या जोडपालवान गुजाच्या पाटो- पणजेच्या कार्यालयांत आयोजीत संवाद कार्यावळींत देसाई उलयताले.
गोंय सरकार गोंयाक आयटी हब करपाचे तयारेंत आसा. पूण गोंयांतले तरणाटे सरकारी नोकरेची संद सोदतात. आयटी मळा वयले खूबशे चले- चलयो लेगीत सरकारी नोकरेंत समाधान मानतात. तरणाट्यांची ही मानसिकता बदलपाक नेमकें कितें करचें पडटलें, असो प्रस्न देसाई हांकां विचारिल्लो. हाची जाप दितना तांणी सांगलें, गोंयाक आयटी हब करचे खातीर सगळ्यांत पयलीं तरणाट्यांची मानसिकता बदलप गरजेचें आसा. मनशाची मानसिकता शाळांतल्यान बदलता. ते कातीर शिक्षण वेवस्थेंत बदल जावप आनी पालकांनी लेगीत आपली मानसिकता बदलप गरजेचें आसा.
गुजरात सारकिल्ल्या राज्यांत उद्देजक जावपाची संस्कृती आसा. जाल्यार गोंयांत नोकरी करपाची संस्कृती आसा. हेच खातीर तरणाटे नोकरी करपाक प्राधान्य दितात. अशें स्थितींत आयटी मळार नांव जोडचे खातीर नवे नवे प्रयोग करपाची तशेंच धोको पत्करपाची गरज आसा. तेच वांगडा गोंय सरकारा कडल्यान आयटी मळाक प्राधान्य दिवपाची गरज आसा, अशें देसाई हांणी सांगलें.
भारतीय अर्थवेवस्थेंत आयटी मळाची भुमिका म्हत्वाची थारल्या. ह्या मळा वयली गुंतवणूक फाटल्या कांय वर्सांत पांच हजार पटींनी वाडल्या. हेर देशांनी आयटी मळ लोकांक सेवा दिवपाचेर भर दिता. भारतांत मात ह्या मळा वयल्यान उत्पादनाक चालना दितात. ताचो व्हड फायदो देशाक मेळटा. आयटी मळार गोंयाक, भारताक वयर काडपाचें ‘टॅलेंट’ निश्चीत आसा. फुडलें यूग आयटीचें आशिल्ल्यान तरणाट्यांच्या ह्या ‘टॅलेंटा’क योग्य माची मेळपाची खर गरज आसा, अशें आशांत देसाई हांणी स्पश्ट केलें.
‘एआय’क लागून वाडटली रोजगार संद
आर्टिफिशियल इंटेलिजन्साच्या (एआय) वाडट्या वापरा उपरांत कांय जाणांच्यो नोकऱ्यो वतल्यो, पूण उत्पादन वाडीक लागून उद्देग वाडून नोकरेच्यो खूबश्यो संदी लेगीत निर्माण जातल्यो, असो विस्वास आशांत देसाई हांणी उक्तायलें. हेर राज्यांतल्यान गोंयांत येवपी आयटी मळा वयल्या उद्देगांक गोंयकारांनी येवकार दिवचो. कारण तातूंतल्यान लोकां खातीर चडांत चड रोजगार निर्माण जावपाक मजत मेळटली, अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
