भांगरभूंय | प्रतिनिधी
चिंबलः सांताक्रूझ मतदारसंघांतल्या चिंबवाचे ‘ते’ वादग्रस्त तळयेचो प्रस्न अंदूंय सुटावो जावंक ना. ह्या वादाक लागून ते तळयेंत अंदूंय गणपती पावोवपाक मेळूंक नात.
हें प्रकरण न्यायालयांत आसा. हाचेर तात्पुरतो उपाय म्हूण हे तळये लागसार आशिल्ले खाजगी बांयेंत गणपती पावोवचे पडले, अशें भाविकांनी सांगलें. मजगतीं, ते बांयंत गणपती पावयतना ते बांयेंत गोबर गॅस प्लांट लायिल्ल्याचें दिसून आयलें.
मजगतीं, गांवच्या लोकांनी देड, 5, 7 आनी आतां 9 दिसांच्या गणपती उदकांत पावय नासतना मुर्तीचेर उदक ओतलें आनी विसर्जनाचें शास्त्र करून सगळ्यो मुर्ती बांय भोंवतणी दवरल्यो. सध्या थंय वट्ट 50 गणेशमूर्ती आसात. मजगतीं, सरकाराच्या वाठारांत आशिल्ले वादग्रस्त तळयेक लागून ह्या जमनीच्या गांवकारांनी खूब खेपे निशेध केलो. जायते फावट प्रशासकीय अधिकारी आनी पुलिसांनीय योग्य उपाय सोदून काडून हो वाद शांत करपाचो यत्न केलो.
विधानसभेंतूय ताचेर जायते फावट चर्चा जाली. पयलीं सांतआंद्रेचे आमदार विरेश बोरकार आनी उपरांत सांताक्रूझाचे सध्याचे आमदार रुडॉल्फ फर्नांडीस हांणी मुख्यमंत्र्याक हे विशीं खूबदां विचारलें. चवथी मेरेन हो प्रस्न सुटावो जातलो अशें उतर मुख्यमंत्र्यान दिलें. पूण तरी लेगीत अजून लेगीत कांयच जावंक ना.
उल्लेख केल्ली तळी ही गणपती तशेंच सरस्वती पावोवपाची परंपरीक सुवात आसा. मुळांत सरकारी जमनींत आशिल्ले तळयेची लीज प्रक्रिया चालू आसतना प्रशासकीय अधिकाऱ्यांनी तरी हाचेर लक्ष दिवचें अशें मत गांवच्या लोकांचें आशिल्लें. आतां बांय भोंवतणीं दवरिल्ल्यो गणेशाचीं मूर्तीं योग्य रितीन पावोवंक नाशिल्ल्यान लोकां मदीं उदासीनताय आसा.
नेमकें प्रकरण कितें?
ही गजाल पयलेच खेपे 31 ऑगस्ट 2019 ह्या दिसा उजवाडाक आयली. गणपती पावोवपा खातीर वापरताली ती परंपरीक तळी एका रातींत मातयेन भरून काडिल्ली. चिंबलाचे तेन्नाचे सरपंच चंद्रकांत कुंकळकार आनी पंच वांगडी लक्ष्मण अडकोणकार हांणी हे सुवातेची पळोवणी केली. उपरांत थळाव्या लोकांक विस्वासांत घेवन पंचायत, पोरणें गोंय पुलीस स्टेशन, उत्तर गोंय जिल्होधिकारी आनी हेर प्रशासकीय अधिकाऱ्यांक पत्र बरोवन आनी ह्या प्रकरणांत लक्ष घालपाची मागणी केली.
मजगतीं, थळाव्या लोकांनी उल्लेख केल्ले सुवातेचे पोरणें फोटो जोडून थंय जायत्या वर्सांच्यान अशें धर्मीक विधी चलत आयिल्ल्याचो पुरावो दिलो. तेन्नाचे उत्तर गोंयची जिल्होधिकारी आर. मेनका हांणी लोकांचें आयकून उपजिल्होधिकाऱ्यांक ह्या प्रकरणाची चवकशी करपाचो आदेश दिलो.
उपजिल्होधिकाऱ्यांनी थळाव्या लोकांक आपल्या कार्यालयांत आपोवन उपाय काडपाचें उतर दिल्लें. थळाव्यांक सर्वेक्षण क्रमांक आनी उल्लेख केल्ल्या सुवातेचो हेर तपशील सादर करूंक अपेस आयलें. ही जमीन प्रोव्हेदोरियाची आसा अशें सर्वेक्षण खात्याच्या पंगडान निरिक्षण नोंद केलें. उपरांत लीज धारकांनी लीजा कडेन संबंदीत कागदपत्रां सादर केलीं. हें प्रकरण फाटलीं पांच वर्सां प्रलंबीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
