भांगरभूंय | प्रतिनिधी
म्हापौर रोहित मोन्सेरात बुधवारा करतले पळोवणी
पणजी : स्मार्ट सीटी खाला रायबंदर वाठारांत 12 क्रॉस ड्रेनांचें काम प्रलंबित आसा. ह्या कामांक लागून भौशिक बांदकाम खात्याक रस्त्यांची कामां पुराय करप शक्य जायना, अशी म्हायती अधिकाऱ्यां कडल्यान मेळ्ळी. मजगतीं, पणजेचे म्हापौर रोहित मोन्सेरात हे बुधवारा रायबंदरच्या रस्त्यांची पळोवणी करतले.
स्मार्ट सीटीच्या कामांक लागून रायबंदरचे रस्ते पेड्डेर जाल्या. नव्यान रस्ते केल्ले आसले तरी पावसाक लागून फोंडकुलां पडल्यांत. तशेंच हॉट मिक्स वा फिनिशिंग करूंक नासल्या कारणान गाडयो गेल्यो काय सगळ्याक धुल्ल पातळटा. पणजे सावन रायबंदर मार्गान वचपी वाहनचालकांचे बरेच हाल जातात. पेड्डेर रस्त्यांक लागून बेजार जाल्या रायबंदरचे नागरिक आयतारा रस्त्यार देंवले. 30 सप्टेंबर मेरेन रस्ते दुरूस्त केले नात जाल्यार रास्ता रोको आंदोलनाची शिटकावणी तांणी दिल्या.
स्मार्ट सीटी खाला पणजेच्या हेर वाठारां सयत रायबंदर वाठारांतल्या रस्त्यां सयत गटारांचीं कामां जालीं. आजून क्रॉस ड्रेनांचीं कामां पुराय जावपाचीं आसात. तीं पुराय करचे पयलीं रस्त्यांचेर हॉट मिक्स घालून तांचे फिनिशिंग करप शक्य जावचें ना, अशी म्हायती अधिकाऱ्यांनी दिली.
रायबंदरच्या रस्त्यांच्या प्रश्नाचेर स्मार्ट सीटी तशेच भौशिक बांदकाम खात्या कडेन हांव उलयलां. क्रॉस ड्रेनांचीं कामां प्रलंबित आशिल्ल्यान रस्ते दुरूस्त करपाक आडखळी येतात. बुधवारा हांव रस्त्यांची पळोवणी करतलों. रायबंदरच्या रस्त्यांच्या स्थितीक स्मार्ट सीटी जापसालदार आसा. पणजी म्हापालिका किदेंच करू शकना, अशें म्हापौर रोहित मोन्सेरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
