त्या आमदारांनी देवांचो, लोकांचो विस्वासघात केला: विरियातो

भांगरभूंय | प्रतिनिधी

वास्को, प्रतिनिधी: काँग्रेस सोडून भाजपांत गेल्ल्या आठ आमदारांनी देवांचो, लोकांचो विस्वासघात केला. तांणी लोकांची उदरगत न्हय तर स्वताचीच उदरगत चड केल्या. तांणी ५० ते ५५ कोटी रुपया घेवन भाजपांत प्रवेश केल्ल्याचो गंभीर आरोप जाता अशें दक्षीण गोंयचे काँग्रेस खासदार कॅप्टन विरियातो फर्नांडीस हांणी सांगलें.
काँग्रेसीच्या आठ आमदारांनी दोन वर्सां आदीं काँग्रेसीक सोडपाची चीट दिवन भाजपांत प्रवेश केल्ली. ते घडणुकेचो निशेध करपा खातीर हांगा काँग्रेस फुडारी आनी कार्यकर्ते एकठांय आयिल्ले. ह्या वेळार कॅप्टन फर्नांडीस हांचे सयत गोंय प्रदेश काँग्रेस समितीच्या ओबीसी विभागाचे अध्यक्ष शरद चोपडेंकार, कुठ्ठाळेचे गटाध्यक्ष पिटर डिसौझा, वास्को गटाध्यक्ष उलारिको रॉड्रिग्ज, अल्पसंख्यांक विभागाचे अध्यक्ष नियाझी शेक, युवक काँग्रेसीचे कार्यकारी अध्यक्ष महेश नदार, आदले नगरसेवक काशिनाथ यादव, अरिफ हसन शेख मसूद शेख, मुरगाव मतदारसंघाचे युवक काँग्रेसीचे प्रभारी झुबेर अहमद, सोशल मिडिया युथ इन्चार्ज साकीब शेख, खजिनदार आर्व्हलिन दोरादो, ओलंसियो सिमोईस आनी हेर कार्यकर्ते हाजीर आशिल्ले. ह्या सगळ्यांनी त्या आठ आमदारां आड घोशणां दिल्यो. तशेंच मुरगावचे आमदार संकल्प आमोणकार हांचो फोटू लासलो.
ह्या वेळार कॅप्टन फर्नांडीस हांणी राज्य सरकाराच्या कारभाराचेर टिका केली. लुटमार आनी भ्रश्टाचार करपी अधिकार्‍यां आड कारवाय जावची सोडून तांच्यो बदल्यो करतात. लश्करांत जशें कोर्ट मार्शल आसता तेच धर्तरेचेर ह्या भ्रश्ट व्यक्तीं आड कारवाय जावपाची गरज आसा अशें तांणी म्हणलें. मुख्यमंत्र्यांनी आपल्या चीअर्स फुडार्‍यां मुखार काडचे बदला फुडें येवन आपली बाजू मांडची, असो उलो तांणी मारलो.
जे आठ आमदार भाजपांत गेल्यात ते सांगतात, आमी लोकांचे उदरगती खातीर हो निर्णय घेतला. तांणी लोकांची कितली उदरगत केल्या हें पयलीं सांगचें. मात तांणी स्वताची उदरगत केली, असो दावो फर्नांडीस हांणी केलो.
नितीन चोपडेंकार हांणी आमदार आमोणकार हांचेर टिका केली. आमोणकार हांच्या प्रचारा खातीर राहुल गांधी आयिल्ले. तांणी तशेंच हेरांनी आमोणकार हांकां जिखयलो. मात आमोणकार हांणी विस्वासघात केलो. तांणी देवाचो, लोकांचो विस्वासघात केला. तांचेर विस्वास दवरूं नाकात, असो उलो तांणी मारलो.