भांगरभूंय | प्रतिनिधी
पेडणें, प्रतिनिधी: गोंय सरकार विवीध माध्यमां वरवीं पर्यटन वेवसायाक उर्बा दिवपाक नव्या येवजण्यां वांगडा विवीध सुविधा उपलब्ध करपाचें काम करता. मात थंय तांकां शंभर टक्के येस मेळना. जो मेरेन थळावी पंचायत, थळावे आमदार, नागरीक सहकार्य करतात तो मेरेन सुविधां पसून पर्यटकांक पयसूच रावचें पडटा. पेडणें म्हालांतल्या मोरजे दर्यादेग वाठारांत व्हडा प्रमाणांत कोयर सांठून उरता. हो कोयर उखलपा खातीर पर्यटन खात्यान जे एजन्सीक टँडर दिला. तो नेमान कोयर उखलिनाशिल्ल्यान टेंबवाडो मोरजेची दर्यादेग पुरायेन कोयरान भरल्या. पर्यटन मंत्री रोहन खंवटे हांणी हाचे कडेन लक्ष घालून हो कोयर उखलपाक लावचो आनी दर्यादेगो नितळ दवरपा खातीर एकजन्सीक सांगचें अशी मागणी मोरजेचे सरपंच पवन मोरजे हांणी केली.
खण वेवसायाचेर बंदी घाले उपरांत व्हडा प्रमाणांत महसूल मेळोवन दिवपी पर्यटन खात्या कडेन सरकारान पुरायेन आडनदर केल्ली. दर वर्सा पर्यटना वरवीं करोडांनी महसूल सरकाराच्या खात्यान जमा जाता. मात तातुंतलो कितले टक्के महसूल सुविधांचेर खर्च करतात. हो एक संशोधनाचो विशय. मोरजे दर्यादेगेर नदर भोंवडायल्यार हांगा पार्कींग वेवस्था ना. दर्यादेगो नितळ ना. चेंजींग रूम, शौचालयांची वेवस्था सामकी करूंक ना. ताका लागून हांगा एकदां आयिल्ले पर्यटक परत येवपाक पळयनात, अशें दिसून येता, अशें मोरजे हांणी सांगलें.
सरकार लाखांनी रुपयांचें कंत्राट कोयर उखलपी एजन्सींक दिता. मात कंत्राट घेतले उपरांत ती एजन्सी कोयर उखलता काय ना? सरकाराचें मात हाचे कडेन लक्ष नासता. पर्यटन मंत्र्यान हांगा अचकीत भेट दिवन कोयर उखलपी कामगार वेवस्थीत कोयर उखलतात काय ना? हाची पळोवणी करून ते एजन्सीचेर खर कारवाय करपाची गरज आसा. दर्यादेगो नितळ नाशिल्ल्यान पर्यटक ताचे व्हिडिओ काडून, ते सोशल मिडियाचेर घालून दर्यादेगांची बदनामी करता अशें दिसून येता. ताका लागून सरकारान हाचे कडेन लक्ष घालपाची मागणीय तांणी ह्या वेळार केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
