भांगरभूंय | प्रतिनिधी
पणजी : गोंय विभागाच्या पोस्ट मास्टर जनरल हांचे वतीन येवपी ३० सप्टेंबराक सकाळीं ११ वरांचेर पणजेच्या गोंय विभागाच्या कार्यालयांत ५९ व्या डाक अदालतेचें आयोजन केलां. गोंय विभागा कडेन जोडिल्ले पोस्टाचे सेर्वे तशेंच कामां विशींच्यो कागाळी सुटाव्यो जावंक ना जाल्यार अशे तरेच्या कागाळींची ह्या डाक अदालतींत दखल घेतले.
मजगतीं, मनीऑर्डर, बचत खातें, प्रमाणपत्र तशेंच टपाल वस्तू अशे तरेच्या कागाळींचो विचार जातलो. ताचे खातीर खंयच्याय कागाळींचो उल्लेख हो सगळ्या तपशिलां सयत करप सामकें गरजेचें. उदाहरण म्हळ्यार ज्या अधिकार्यांकडेन तुमी कागाळ नोंद केल्या ताचें नांव, तारीख तशेंच तांचो हुद्दो आनी हेर गजाली.
संबंधितांनी पोस्ट सेवे विशींच्यो आपल्यो कागाळी सहाय्यक निदेशक डाक सेवा-१ पोस्टमास्तर हांचें कार्यालय, गोंय विभाग, पणजी ४०३००१ हांच्या नांवान १९ सप्टेंबर वा त्यान पयलीं पावतल्यो अश्यो धाडच्यो. वांगडा आपल्या कागाळींचे तपशील आशिल्ल्यो २ कॉपीय जोडच्यो. १९ सप्टेंबर वा ताचे उपरांत आयिल्ल्या कागाळींची दखल घेवचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
