भांगरभूंय | प्रतिनिधी
धर भाई जे करतात तें जीव ओतून, हाचो प्रत्यय परत एक फावट येवपाक कारण म्हणल्यार तांचें नवें करकरीत पुस्तक सृजनरंग ! अशें पुस्तक येवचें ह्या कळकळींतल्यान ह्या पुस्तकाचो जल्म जाला. गोंयांत जल्मल्ले आनी जगभर किर्ति मेळयिल्ले खूब सृजन, तातूंतल्यान चित्ररंग कँन्वासाचेर सजोवपी चित्रकार सासणाचे याद उरपाक जाय ही श्रीधर भाईली इ्त्सा. हीच ती श्रीधरभाईली सृजनशीलता, जी जीवंत चित्र रंगयता. रंगमाचयेर दोळे दिपकायता, लेखणींतलान झिरपता आनी गुणी विद्यार्थी तयार करपाक तळमळ दाखयता.
श्रीधर कामत बांबोळकार गोंयांक लाभप हें गोंयचे भाग्य. तांची कला क्षेत्रांतली कारगिर्द वाचून थक्क जाता, तोंड “आं” जाता . असो सर्वश्रेष्ठ, सद्गुणी, कलासंपन्न तसोच कलामोगी गोंय सोडनासतना बोकडबाग- बांदोडा रावन कलेची, समाजाची सेवा करतना पळोवन नतमस्तक जाले बगर कोणूच रावचो ना.
“सृजनरंग” पुस्तक वाचतना वाचक मग्न जाता. आपल्याक खबर आशिल्या चित्रकाराची म्हायती वाचतकूच ताका खोशी जाता. तशेंच अनवळखी चित्रकारांची म्हायती वाचून नवें कितें गिन्यान मेळिल्ल्याचें सार्थक जाता. कलाकाराक विविध चित्रांविशीं मोलाची म्हायती मेळटा आनी वेगवेगळे चित्रकारीतेचे प्रकार आनी ते कोणे बेस बरे हाताळल्यात ते आमकां समजता. चित्रकाराच्या कुंचल्यांतल्यान काडिल्लीं चित्रां उलयतात, चित्रांतल्यान रागदारी आकार घेता , तांचे रंग , मूडस् कितें ते सांगता अशी अनेक गुपितां हे पुस्तक आमचे मुखार दवरता. कलाकाराच्या जीणेची फाटभूंय तांणी काडिल्ल्या चित्रांनी कशी उमटता हाचें अजाप दिसले बगर रावना. चित्रकारांची खासीयत वळखून तेप्रमाण तांच्या नांवा मुखार नोंद केल्या ते खूब दर्जेदार आनी चित्रकाराची वळख वाडोवपी थारता. देखीक,जागतीक किर्तीचो शिल्पकार: रामचंद्र पांडुरंग कामत. व्यंगचित्रांचो जादुगार: मारीयो मिरांडा.
वास्तू-शिल्प-चित्रकला ह्या पुस्तकान वाचकां सामकार येता. गोंयच्या सोबीत देवळांचें नक्षीकाम आनी तांची सुबक बांदावळ हांची नोंद जेन्ना “सृजनरंग” घेता; तेन्ना” वास्तू “हो कलेचो भाग हाची आमकां प्रखरतेन जाणीव जाता. मंगेशी, कंवळें तांबडी सुर्ला ची चित्रां आमच्या गोंयची हे पळोवन आनंद जाता..
प्रतापगड किल्ल्या वयलो शिवाजी महाराजांचो अश्वारूढ पुतळो घडोवपी, बांदोडेची महालक्ष्मी देवीची मूर्त घडोवपी अशो अनेक अजरामर पुतळे आनी शिल्प घडोवपी जागतीक किर्तीचे रामचंद्र पांडुरंग कामत
हांचे अजोड कार्य वाचकां मुखार येवन शिल्प कलेचे दायज मुखार आयिल्याचो साक्षात्कारसो जाता.
पुनरुज्जीवित जावपी ‘कावी कलेचो’ आसपाव करपाक सृजनकार विसरूना म्हणून अप्रूप! तीच गजाल “सतीफळ” आनी “ गोवा इन्क्विझिशन” या दोन चित्रां संबंदी. ही दोन चित्रां आसपावन लेखक समाजा कडेन आपली आशिल्ली लागणूक व्यक्त करता जावंये.
दरेक चित्रकार आनी शिल्पकार हांचें पुराय नांव, जल्मगांव, आवय-बापायची थोडे भितर म्हायती, तांचें शिक्षण, तांचे गुरू, तांकां मेळिल्लें येस, तांच्या कलाकृतींची नांवां, तांच्या कार्याचो आवाट, निमणें तांच्या मृत्युची नोंद अशी सादारण ठेवण दर एक कलाकाराच्या शब्दचित्रांत येता. तरीय पूण, हें सोदून काडपाचें काम निकटे ‘कट अॅंड पेस्ट’ जावूंक ना. ताका निजी स्पर्श आसा. प्रत्यक्ष मेळिल्ल्याच्यो खुणो आसात, मोगाच्या दोऱ्यान बांदिल्ली ही गुंफण देखूनूच रसपूर्ण आनी दर्जेदार थारता. “सृजनरंगकारान” कलाकार, ताची कलाकृती आनी ताचें जिवीत हांचो सुंदर गोफ बांदला. तांच्या जिवनांतलो वयर-सकयल पाडाव, तातूंतल्यान तांणी केल्लो खडतर कला प्रवास हाचे पदर खूब आत्मीयतेन उलगडल्यात. म्हणून ते निकटे विश्लेषण न्हीं तर खरे शब्दचित्र थारता.
कला आंगांत आसप ही देणगी. ती रुजोवप, वाडोवप हें कलाकाराचें काम. खरें म्हळ्यार कला ताका स्वस्थ बसूंक दिना. कितलींय आडमेळी आयल्यार लेगीत ताची कला लिपचोरयांनी प्रकट जाता. कलेचो अविश्कार जगामुखार येताच. हेच सत या शब्द चित्रांनी चडशा सगळ्या कलाकाराच्या आयुश्यांत दिसून येता. तांतूत कांय भाग्यवान मात आवय-बापायची कला फुडें व्हरून कलेक नांवलौकीक मेळोवन दिवपाक समर्थ थारल्यांत.
रंगसम्राट दीनानाथ दलाल हांची सही “लाल रंगातलो त्रिकोण आनी तांतूत द हें उतर” ही भुरगेपणांत घेतिल्ली नोंद, सासणाची तकलेंत उरल्या. तांच्या चित्रांची भुरगेपणा सावन ओड. दलालांचे शब्दचित्र वाचून जीव धादोस जाता.
‘‘सार्वभौम चित्रकार’’ अशा शब्दांनी रघुवीर मुळगांवकार हांचो उचीत सन्मान श्रीधर भाई करतात. खऱ्यांनीच तांच्या कुंचल्यातल्यान निर्माण जाल्या चित्रांनी आमी देवरूप पळयलें, तांची चित्रां पळोवन आमकां अभ्यास
आनी पुस्तकांची गोडी लागली. अशा कलाकाराक सृजनरंगान वाचून आंगार कांटो फुलता.
स्वररंग जाच्या चित्रांत येतात ते थोर चित्रकार लक्ष्मण पै हांचो कलाअविश्कार आनी कला निर्मीतींतलें सातत्य वाचून आमी अजापीत जातात.
एकूण, चित्रकार आनी चित्रां विशीं उत्सुकता आनी मोग वाडोवपाक “सृजनरंग “मोलाचें काम करता. खंयच अतिशयोक्ति ना. जसो कलाकार आसा सामको तसो वाचकां सामकार चित्रीत करूंक लेखक सफल जाता. पयलीं खंयच प्रसिद्ध न करता “ताजें -फडफडीत” पुस्तक वाचकांच्या हातांत दिल्ले बद्दल
श्रीधर कामत बांबोळकार हांकां मना पासून परबीं. पुस्तक वाचून म्हायतीच न्ही तर खूब दिसांनी बरें पुस्तक वाचिल्ल्याचें समादान मेळटा.
स्मिता तिंबले
97635 52719
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
