भांगरभूंय | प्रतिनिधी
वाळपय: सरपंच दीक्षा गांवस हांणी सरपंचपदाचो राजिनामो दिले उपरांत पर्यें मतदारसंघांतल्या केरी पंचायतीचेर नवी सरपंच म्हूण सुप्रिया गांवस हांची काल बिनविरोध निवड जाली. दीक्षा गांवस हांणी सरपंचपदाचो राजिनामो पंचायत संचालका कडेन सादर केल्लो.
हो राजिनामो मंजूर जाले उपरांत नवी सरपंच वेंचून काडपा खातीर पंचायत संचालकांनी वेंचणूक निश्चीत केल्ली. ही वेंचणूक शुक्रारा 12 सप्टेंबर दिसा सकाळीं पंचायत सभाघरांत जाली. ह्या वेळार नंदिता निलेश गांवस, संदीप पुर्सो ताटे, श्रीपाद धनो गांवस, राजेश गांवस, तन्वीर चंद्रकांत पागंम, दिक्षा चंद्रकांत गांवस, उस्मान इस्मायल सय्यद, भिवा नारायण गांवस हे पंच वांगडी हाजीर आशिल्ले.
सरपंचपदा खातीर सुप्रिया गांवस हांचो एकूच उमेदवारी अर्ज सादर जाल्लो. ह्या अर्जाची छाननी जाले उपरांत तो वैद्य थारायलो. उपरांत हाजीर आशिल्ल्या वाळपय गटविकास कचेरेचे विस्तार अधिकारी लक्ष्मण नायक हांणी सुप्रिया गांवस हांची बिनविरोध सरपंचपदार निवड जाल्ल्याची घोशणा केली. ह्या वेळार हाजीर आशिल्ल्या हेर पंच वांगड्यांनी सरपंच सुप्रिया गांवस हांकां फुलांतुरो भेटोवन अभिनंदन केलें.
ह्या वेळार आपली प्रतिक्रिया उक्तायतना सरपंच सुप्रिया गांवस हांणी सांगलें, पंचायत वाठाराचो विकास करपा खातीर थळाव्या आमदाराच्या मार्गदर्शना खाला काम करतली. ज्यो प्रलंबीत समस्या आसात त्यो सोडोवपाचे नदरेंतल्यान म्हत्वाचें योगदान दितली. हे खातीर सगल्या पंच वांगड्यांनी सहकार्य करचें अशी विनंती तांणी केली. पर्यें मतदारसंघांतली केरी ग्रामपंचायत ही म्हत्वाची मानतात. ह्या पंचायतीचो भुगोलीक वाठार मोटो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
