भांगरभूंय | प्रतिनिधी
देवीक मुकूट, हार, व्हडीं दिवपाचें राजेश फळदेसाय हांचें आस्वासन
माशेल: कुमारजुंवेंच्या श्रीशांतादुर्गा कुमारजुंवेंकान्न देवीच्या सात दिसांच्या गणपती विसर्जना निमतान कुमारजुंवें पंचायती वतीन आयोजीत केल्ल्या सांगोड चित्र देखाव्याचे सर्तींत टीम 45 न सेगीत तीन वर्सां पयलें इनाम जिखून अंदूंय एक लाख रुपया रोख आनी करंड जिखलो.
दुसरें इनाम 60 हजार आनी करंड श्रीभौशीक सरस्वती उत्सव मंडळ गोळवाडो, तिसरें इनाम 40 हजार आनी करंड पॅट्रीक ग्रूप, चवथें इनाम बॉयज ऑफ चिंचेश्वर, पांचवें इनाम ज्ञानगीत कला मंडळ रामभुवनवाडो, सवें इनाम साई क्रिकेटर तांकवाडो हांकां फावो जालें. हे सर्तीचें परिक्षक म्हूण अर्जून ना. नायक, उमेश दा. नायक, दर्शन ना. नायक हांणी काम पळयलें.
इनाम भेटवण सुवाळ्यांत मुखेल सोयरे म्हूण कुमारजुंवेंचे आमदार राजेश फळदेसाय, खास निमंत्रीत म्हूण डेक्कन फायन कॅमिकलाचे एचआर मुखेली गौरव कुडचडकार, शांतादुर्गा कुमारजुंवेंकान्न देवस्थानाचे अध्यक्ष डॉ. शिवाजी शेट, थळावे सरपंच सचीन गावडे, उपसरपंच विंदा जोशी आनी सगले पंच वांगडी हाजीर आशिल्ले.
मानेस्तांक पंच वांगडी सुरेंद्र नायक हांणी फुलांतुरे भेटयले. सरपंच सचीन गावडे हांणी येवकार दिलो.
कुमारजुंवेंच्या सांगडोत्सवाची शेंकड्यांनी वर्सांची परंपरा आसा. हांगा व्हड प्रमाणांत कलाकार आसात हाची खात्री ह्या सांगडोत्सवांत सादरीकरण केल्ल्या आकर्शक आनी विवीध विशयां वेलें चित्र देखाव्याचे फाटभुंयेर येता. तांची कला पळोवन अंदूं इनामाची रक्कम दुपेटीन करून कलाकारांची उमेद वाडयल्या. जानेवारी म्हयन्या मेरेन म्हजे वतीन शांतादुर्गा कुमारजुंवेंकान्न देवीक मुकूट आनी हार तशेेंच देवीच्या सांगडाक लागपी दोन लांकडाचीं व्हडीं सांगडोत्सव उत्सवा पयलीं दिवपाचें आस्वासन, तशेंच पर्यटन मंत्री रोहन खंवटे हांणी ह्या सांगडोत्सवा खातीर पर्यटन खात्या वतीन विशेश योगदान दिवपाचें मान्य केलां अशें आमदार राजेश फळदेसाय हांणी सांगलें.
शांतादुर्गा कुमारजुंवेंकान्न देवीची चवथ आनी देवीचें कमरसये खोर्ली सावन स्थलांतर कशें जालें हाचो इतिहास सांगून देवीची कृपादृश्टी आमचेर आसा, आनी वेळावेळार ती आमकां संकश्टांतल्यान वाटायता. तिच्या सांगडोत्सवा खातीर लागपी लांकडी व्हड्यांची सोय नक्कीच जातली अशें शांतादुर्गा कुमारजुंवेंकान्न देवस्थानाचे अध्यक्ष डॉ. शिवाजी शेट हांणी सांगलें.
कार्यावळीचें सुत्रसंचालन आनी उपकार ऐश्वर्या च्यारी हांणी मानले. ह्या सांगडोत्सवांत पर्यटन मंत्री रोहन खंवटे हांणी हाजेरी लावन ह्या सांगडोत्सवाची आनंद घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
