भांगरभूंय | प्रतिनिधी
पुणे, खबरां संस्था : देशांतल्या इलेक्ट्रीक वाहन उद्देगाची वर्सुकी वाड २०२७ मेरेन २५ ते ४० टक्के दरान सुरू उरतली, असो अदमास ‘निवेशआय’ संस्थेच्या अहवालांत दिला. देशांत २०२५ मेरेन ई- वाहनांची वर्सुकी विक्री ३० ते ४० लाखांचेर पावपाची आशिल्ल्यान २०३० मेरेन ती एक कोटींचेर पावतली अशेंय अहवालांत म्हणलां.
निवेशआय हो हरित ऊर्जा क्षेत्रांतलो मंच. ह्या मंचान देशांतल्या ई-वाहन उद्देगा विशीं तयार केल्ल्या अहवाला प्रमाण, देशांतल्या ई- वाहन बाजारपेठेची २०२७ मेरेन ३५ ते ४० टक्के वर्सुकी दराने वाड चालूच उरतली. बाजाराचे हे वाडींत ई-दुचाकी आनी ई- तीनचाकीचो वांटो सुमार ८० टक्के आसा. ई-वाहनांची वर्सुकी विक्री त्या वर्सा ३० ते ४० लाखांची पातळी हुपतली. देशांत वट्ट वाहनांचे विक्रेंत ई- वाहनांचो वांटो १० ते १५ टक्क्यां वयर वचपाचो अदमास आसा. सरकारा कडल्यान मेळपी सवलती, इंधनाचें वाडपी दर आनी गिरायकां मदीं वाडपी जागरुकताय ह्यो गजाली ई- वाहनांच्या बाजारपेठेच्या विस्ताराक कारणीभूत थारता.
देशांत २०३० मेरेन ई- वाहनांची वर्सुकी विक्री १ कोटींचेर वतली. तातूंत ई-बस, वाणिज्यीक वाहनां आनी प्रवासी मोटारी हांचे विक्रेंत मोठी वाड जाल्ली दिसून येतली. वट्ट नव्या वाहनांचे विक्रेंत ई-वाहनांचें प्रमाण ३० ते ४० टक्क्यां वयर वतलें. येवपी काळांत देशभरांत २० लाखां परस चड भौशीक चार्जींग स्टेशनां निर्माण जातलीं अशेंय अहवालांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
