भांगरभूंय | प्रतिनिधी
सगल्यो अडचणीं पयस करून विधेयक चालीक लावचें; बायलां एनजीओची मागणी
पणजीः सरकार आपल्या फायद्याचीं विधेयकां आसा तांकां रोखडीच मंजुरी दिता. पूण जेन्ना विधवा भेदभाव सारकिल्ल्या विधेयकाचो विशय येता तेन्ना मुद्दाम कुशीक दवरता. विधवा भेदभाव हो धर्मीक आनी समाजीक विशय जावन आसा तो सरकारान समजिकायेन सोडवापाची गरज आसा. देखून हें विधेयक बेगोबेग चालीक लावचें, अशें बायलां समाज वावुरप्यांनी मागलां.
विधवा भेदभाव विधेयकाचो मसुदो तयार जाला आनी हाचे विधेयकांत रुपांतर जावपा खातीर हो मसुदो बायलां आनी भुरगीं उदरगत संचालनालयांत फाटले तीन म्हयने पडून आसा, अशी बातमी ‘भांगरभूंय’न उजवाडाक हाडिल्ली. हे बातमेचेर बायलांच्या भल्या खातीर वावुरपी एनजीओनी आपली प्रतिक्रिया दिल्या.
बायलांच्या हक्कांक सरकार प्राधान्य दिना. सरकाराचें प्राधान्य फक्त पयशे जोडपाच्या गजालींक आसा. जेन्ना बायलांचे सुरक्षे विशींचो प्रस्न येता तेन्ना सरकार सांगता एक आनी करता भलतेच, असो आरोप समाज वावुरपी सबिना मार्टीन्स हांणी केलो.
हो मसुदो बायलां संघटणे कडेन चर्चेंक येवचो ही आमची मागणी आसली ती अजून मेरेन पुराय जावंक ना. सरकारान ह्या विधेयकाची बेगोबेग अंमलबजावणी करपाची गरज आसा, अशी मागणी मार्टीन्स हांणी केली.
जागृताय, अंमलबजावणी आनी न्याय हे विधेयकाचे मुखेल घटक आसपाक जाय. विधवाचेर भेदभाव जावचो न्हय हे खातीर लोकां मदीं पयली जागृताय करपाची गरज आसा. उपरांत तिचेर कसलोय अत्याचार जालो जाल्यार पुलिसां कडल्यान बेगोबेग कारवाय करपाची तरतूद आसपाक जाय. विधवा बायलेक न्याय मेळटलोच ही भुमिका ह्या विधेयकाची आसपाक जाय, अशें मत सबिना मार्टिन्स हांणी मांडलें.
विधवा बायलेक सुरक्षा दिवप हें विधेयकाचें मुखेल उद्दीश्ट आसलें. पूण म्हाका खबर ना सरकार हें विधेयक हाडपाक परत परत उशीर कित्याक करता, अशें बायलांचो एकवट ह्या एनजीओची मुखेली आवडाा व्हिएगश हांणी सांगलें.
आयच्या काळांत कसलोच भेदभाव जावपाक जायना. पूण जेन्ना बायलांचे बाबतीचे विशय येतात तेन्ना सरकार तें फुडें धुकलत रावता. आतां सरकारान मनार घेवन हें विधेयक बेगोबेग मंजूर करचें अशी मागणी व्हिएगश हांणी केल्या.
धर्म आनी समाज हे विधेयकाचे दोन मुखेल घटक आसात. धर्मीक स्थानांत आमी बायलांक स्थान दिनात म्हूण ह्या विधेयकाक कळाव जाता अशें म्हाका दिसता. दादल्याचे सत्ते मुखार बायलां वयर सरिल्लीं कोणाक नाकात, अशें मत व्हिएगश हांणी मांडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
